Kalaallit qulerarterutaat ukiukkut nikallungasarput

Danmarkimi inuit tallimararterutaat ukiukkut nikallungasarput. Kalaallit Nunaanni inuit 12 procentii ukiukkut nikallungasarput.

Taartarnerata nalaani nikallungalerujussuarsinnaavugut. Assi Qaanaamit. Bent Hansen

Inuuneq qaamasumik taartumilluunniit isigisarparput, novembarimiillu upernaap tungaanut ilarpassuagut nikallungasarput.

- Qaamanerup tamatta sunnertarpaatigut, taartullu nukillaariartortittarluta. Amerlanerpaat isumaqaerput ulluni takisuuni, qaamasuni kiattunilu inuunerinnersaasarlutik, ulluni naatsuni, taartuni masannartunilu nikallunganerusarlutik, nakorsaaneq tarnillu pissusianik ilisimasalik Henrik Dam, Rigshospitalip tarnikkut nappaatilinnut immikkoortoqarfianeersoq, oqarpoq.

Amerlanerpaat taartoq nikallunganalaartutut qaangeruminaatsutullu misigisaraat amerlasuut nukissaarullutik unittuittarput sinikkusuttartorujussuullutik mamakujuttunillu saammarsaatilersortarlutik.

Taamatut allappoq Viborg Stifts Folkeblad.

1800-ukkut naaginnalersulli issittunut ilisimasassarsiortarnersuit ilaanni umiarsuup nakorsaata allaaseraa inuttat qanoq isillutik ukiukkut piumassuseerunnermik eqqorneqartut, 1984-imilu tarnip pissusianik ilisimatuup N. E. Rosenthalip tamanna atserpaa: Seasonal Affective Disorder - kalaallisut ukiukkut nikallungasarneq. Kingorna ilisimatuut nikallunganerup annikillisaatissaanik nassaarput, tassalu qaamanermik katsorsaaneq.

Misissuinerit takutippaat avannarpasikkiartortillugu taarsiartortillugulu - inuit amerlanerit ukiukkut nikallungasartut. Henrik Damip nunatta avannaani pissutsit misissorsimavai. Tassani innuttaasut 12 procentii ukiukkut nikallungasarput, Danmarkimi innuttaasut 5 procentii taamaattartut.

Powered by Labrador CMS