Immap umiarsualiviit nungusarpai

Umiarsualiviit tamavimmik iluarsaanneqarnissaminnut 80 mio. kr.-nit missaannik kinguaattooqqapput. Iluarsaassinissamut aappaagumut aningaasaliisoqanngilaq assartuinermut kommissionip saqqummiussai pissutigalugit.

Immap piffissallu umiarsualiviit ilarparujussui aserfallatsissimavaat iluarsaattariaqartorujussuanngortillugit. Ass.: Leiff Josefsen

Taamatut kinguaattoortoqarnerujussua saqqummerpoq Jens B. Frederiksen Siumumeersup Kristian Jeremiassenip paragraf 36-imi apeqqutaanut akissutaani.

Jens B. Frederiksenip naalakkersuisoqarfia iliuuseqarnissamut pilersaarusiorsimavoq piffissaq ungasinnerusoq isigalugu iluarsaatassat ilaasa iluarsaannissaannut.

- Pissutsilli imaapput umiarsualivitta ilarparujussui pisoqalisimasut aserfallassimasullu, tamannalu ataavartumik aserfallatsaaliinissamut annertuunik piumasaqartitsivoq, Jens B. Frederiksen erseqqissaavoq.

Kontumili pingaanermi 87.73.10 Umiarsualiviit 2011-mut aningaasanik immikkoortitsisoqarsimanngilaq.

Assartuinermut kommissionip nunatsinni angallannermi aaqqissuussaanerup tamarmiusup naliliinissaa Naalakkersuisut utaqqeqqaarniarsimavaat aamma nunaqarfinni talittarfinnut pilersaarusiulinnginnerminni. Naatsorsuutigineqarpoq Assartuinermut kommissionip isumaliutissiissunni Upernaakkut ataatsimiinnissami Inatsisartunut saqqummiutissagaa oqaluuserineqarnissaa siunertaralugu.

- Tamanna tunuliaqutaralugu neriuutigaarta angallannermi atortorissaatit tamarmiusut tulleriissaar nissaannut Inatsisartut peqataarusussasut - tamatumani aamma ilanngullugu nunaqarfinni talittarfiit nutarsarnissaannut aningaasaliisoqassanersoq, Jens B. Frederiksen oqarpoq.

Powered by Labrador CMS