Niviaq unamminermit peersitaavoq
Niviap world cupimi sisoraatinik oqilaniunnermi pingajussaa peqataanera iluatsinngilaq.
Niviaq NUP - Nuuk-meersoq juullimut uninnganissaq sioqqullugu pingajussaa world cupimi peqataavoq.
151 km-imut sukuutsernermi peqataavoq, taannalu ingerlanneqarpoq 2,5 km-inik isorartussusilik sivingasunik qummukarialik uteqattaarlugu, unammisut imminnut takusinnaajuaannarlutik.
Taanna arfinileriarlugu kaajallanneqartussaavoq. Unammeriaaseq tamanna qaratsakkut tamaviaarnaqaaq. Unammineq aamma 1000 meterit sinnerlugit qaffasissusilimmi ingerlanneqarpoq.
Niviaq ajugaasumit Margit Bjørgenimit kaajallannermik ataatsimik qaangerneqarpoq, taannalu world cupimi unammisaqattaarnerni saperneqarluinnarpoq. Malittarisassat malillugit Niviaq unitsiinnarneqarpoq.
Peersitaasunili kisimiinngilaq. Unammisut katillugit tallimat unitsiinnarneqarput. Nivialli meterit untritillit ikittuinnaat amigaatigisimavai peersitaannginnissaminut.
Ataatsimut isigalugu Niviap ineriartornera sisoraatinik oqilaniunnermut ataatsimiititaliap naammagisimaarpaa.
Januarip 21-ianni qallunaat sisorartartunut kattuffiata aalajangissavaa Niviap angusai VM-imut anngunnissamut naammannersut, nunatsinni sisorartartunut ataatsimiititaliap siulittaasua Ole Lynge Hansen paasissutissiivoq.