Skip to main content

Sinerissami akulikinnerusumik aallartoqartassaaq

Nunatta qeqqani nunaqarfinnut ilaasunik angallassinermut nutaamik isumaqatigiissusiortoqarpoq.

- Royal Arctic Bygdeservicep aamma Namminersorlutik Oqartussat sullissinissamut isumaqatigiissutaanni ilaasunik angallassisussaatitaaneq taamaallaat Kalaallit Nunaata Qeqqanut tunngasuuvoq. Nunap immikkoortuini allani nunaqarfiit nioqqutissanik pilersorneqarnissaat sullissinissamut isumaqatigiissummi taamaallaat pineqarpoq. Tassa ilaasunik angallassineq Royal Arctic Bygdeservicep suliassaani pingaarnersaanngilaq. Kisianni Arctic Umiaq Line taamatut ingerlatsisuuvoq, taamaattumik sullissisorissallugit ajunngilluinnarpoq, Royal Arctic Bygdeservicemi pisortaaneq John Rasmussen oqarpoq.

Arctic Umiaq Line sullissisussatut pisussaaffini naammassisinnaajumallugu angallassisartunik namminersortunik Nuummi, Maniitsumi aamma Sisimiuni isumaqatigiissuteqarpoq. Sapaatit akunnerat ataaseq allortarlugu ilaasut Royal Arctic Bygdeservicep umiarsuaaraannut assartuutinut ilaasassapput. Sapaatit akunnerini allani ilaasunik angallassineq illoqarfimmit qaninnerpaamit aallaaveqassaaq angallassisartup namminersortup angallataanik attartukkamik ingerlanneqartassalluni.

- Angallatit isumaqatigiissuteqarfigisat siusinnerusumut naleqqiullugu sukkanerupput. Tamatuma kingunerisaanik sullitavut, illoqarfimmit qaninnerpaamit aallartussaagunik sukkanerusumik apuussinnaapput, aamma nunaqarfinnut, Arctic Umiaq Linemi pisortaaneq Jette Larsen oqarpoq.

Soorlu assersuutigalugu Maniitsumiit Kangaamiunut angalaneq nalunaaquttap akunneranik ataatsimik minutsinillu 15-inik sivisussuseqartassaaq ilaasuinnarnik angallassisoqartillugu – sapaatilli akunnerini aammattaaq nassiussanik assartuisoqartillugu nalunaaquttap akunnerinik sisamanik sivisussuseqassalluni.

- Tamatuma ilaasussat arlaqarnerusunik qinigassaqartissavai. Sapaatit akunnerat allortarlugu maannakkut atorneqartoq ilisimaneqareersoq atorsinnaavaat, tassa kujataani Qeqertarsuatsiaanit avannamut Sarfannguanut aqqutaa tamaat ilaasinnaallutik. Sapaatit akunnerat allortarlugu sukkasuumut ilaalluni illoqarfimmut qaninnerpaamut aamma nunaqarfimmut qaninnerpaamut angalasoqarsinnaavoq – taamaattorli sukkasuumut ilaalluni illoqarfiit akornanni angalasoqarsinnaanngilaq. Tamatumalu saniatigut angallassisartut namminersortut aalajangersimasumik kaaviiaartitaqalissapput, Jette Larsen oqarpoq.

Aammattaaq Royal Arctic Bygdeservicemi annertuumik iluarisimaarinnittoqarpoq.

- Aningaasaqarneq eqqarsaatigalugu uagut iluanaaruteqassanngilagut, tassa isertitat ilaasunik angallassinermit pisut isumaqatigiissutip aningaasartuutitaanut matussutitut tamarmik atorneqartussaammata. Kisianni nassiussanik assartuinermik qitiutitsinissatsinnut periarfissaqassaagut, tamannami pingaarnertut suliassarigatsigu, tamatumunnga ilutigitillugu ilaasut Arctic Umiaq Linemi isumannanngillat, taakkumi ilaasunik angallassineq piginnaaneqarfigaat, John Rasmussen naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER