Kommunip niviarsiaraq atornerlunneqarsimasoq sumiginnarpaa
Isumaginnittoqarfimmi inersimasut panissiamik 13-inik ukiullip kinguaassiutaasigut atornerlunneqarsimasup katsorsartinnissaanut kissaateqarlutik saaffginnissutaat tusaanngitsuusaarneqarpoq.
Arnamit angummillu ikioqqulluni saaffiginnissutit arlaqartut kommunimi isumiginnittoqarfimmit akissuteqarfigineqartarsimanngillat.
Aappariit panissiamik 13-inik ukiullip taperserneqarnissaa qinnutigisarsimavaat, taannami kinguaassiutimigut atornerlunneqarnermi innarlerneqarsimanermilu kingunerisaanik nanertuuteqarpoq.
Ombudsmandip kommunip sulinera isornartoqartippaa.
Pisut allaaserinerani kommuni sorliunersoq Ombudsmandimit oqaatigineqanngilaq. Tamanna niviarsiaqqap kinaassusersineqannginnissaanut tunngavoq. Suliami D-tut eqqartorneqarpoq.
Arnap uitaavataalu niviarsiaraq paarisarilerpaat, D nunaqarfimmi peroriartorsimavoq ilaqutaata utoqqasaap paarisaralugu.
Angutip arnallu D sapinngisartik tamaat nammineernissaanut sakkussaanik inuunerminilu nalaatami qaangerniarnissaanut tuniorarniarsaraat.
Arnaq angullu isumaqarput Qaqiffimmi ilaqutariittut katsorsartinnissartik pisariaqartillugu, nammineerlutilli panissiamik inuttut nalaatami anigornissaannut suliaqarnissartik nukissaqarfiginngilaat.
Inersimasut aappaat Qaqiffimmiinnermini tapersortaanissani neqerorutigaa. Kommunimi isumaginnittoqarfimmut allakkamini ilaqutariittut katsorsartinissartik qinnutigaat. Angut arnarlu tunngavilersuutitut ilaatigut allapput:
- Meeraanermini ilaatigut pilersorneqarnini, asaneqarnissaq, tapersorsorneqarnissaq pakkutarineqarnissarlu annaasimavai. Tatiginnikkunnaarpoq imminullu naleqartikkunnaarluni, ersiortarpoq, qunulluni, tunuarsimalluni, aliasulluni, susinnaanngitsutut misigisimalluni, kanngusulluni ittoorlunilu, taakkulu kinguaassiutimigut kanngutsaatsuliorfigineqarnerata kingunerai. Ilumigut kamassimanera paasilluarparput, matoqqalluni kipiluttunartorsiorlunilu, aamma tanikkut anniarlunilu ikilerneqarsimavoq, inersimasunngoriartulernerminilu aamma ilumini paatsiveerussimalluni. D siuariaateqalaareersimavoq, angerlarsimaffitsinni tapersersorneqartarnermigut, ullaakkut itertarnissaanik ilinniartippara, taannalu ilinniartunngoruni sulisalerunilu atorfissaqartilerumaarpaa, ilikkarpaalu. Iluaqutigalugulu qujamasuutigeqaarput tatigalunga isummani allassimammagit uannullu tunniullugit, qanoq imminut paarinissaq eqqiluisaarnissarlu pingaartigisoq. (...) Inissaqartipparput qanittumillu attavigalutigu, piffissap annersaani meeraasutut misigisimatinniartarlugu, aammali atuarnermigut atuaqatimisut inissisimanissaa anguniarlutigu. Tamakku sungiusimanngilai.
Isumaginnittoqarfiup allakkat Qaqiffimmiinissamillu qinnuteqaat akissuteqarfiginngilai.
Angut arlaleriarluni isumaginnittoqarfimmut nunaqarfiullu allaffianut saaffiginnittarsimavoq akissuteqartitsiniarluni. Pisortanit qisuariarfigineqartarsimanngilaq. Angut naapertorlugu atuarfik nakoqasallu isumaginittoqarfimmut saaffiginnittarsimapput qisuariartoqartarsimanngilarli.
Isumaginnittoqarfimmit qisuariartoqarmat kommunip ilaqutariit katsortarsinissaat oqaasiinnakkut itigartippaa.
Arnaq angullu ombudsmandimut maalaaruteqarput, taakkulu suliamik naliliipput.
Ombudsmandi ilaatigut isornartorsiuivoq kommuni niviarsiaraq 13-inik ukiulik pillugu saaffiginnissummut siullermut akissuteqarsimanngimmat. isornartorsiorpaa kommuni ilaqutariit katsorsartinnissaanut oqaasinnakkut itigartitsimmat maalaarnissamut allakkatigullu tunngaliersuilluni allannissamut ilitsersuuteqaratik. Aamma kommunip allakkatigut uppernarsaatissaqarnerata naammaginannginnera isornartorsiorneqarpoq.
Ombudsmandip ukioq manna naliliineri uani atuakkit: