Klassillammak pujortarunnaarpoq
Mathias Storchip Atuarfiani Ilulissani 6. a aamma 6. b PAARISA-p 2010-mi klassi pujoqanngitsoq pillugu unammisitsinerani ajugaapput.
Klassimi atuartut nersornaaserneqarnermik saniatigut katillugit 30.000 koruuninik akissarsitinneqarput.
Nunatsinni tamarmi 5. – 7. klassit unamminermi peqataanissaminnut periarfissaqarput. 2010-mi unamminermi anguniarneqarpoq amerlanerpaat pujortarunnaarnissaat. Piumasaqaatit makuupput: :
- Unamminerup naanerani klassimiittut tamarmik pujortartassanngillat.
- Inuit klassimit pujortarunnaartitsisut uppernarsarsinnaasariaqarpaat ilumut pujortarunnaavissimasut.
- Klassimi suliniutaasimasut ingerlanneqarsimasut nalunaarusiarineqassapput. .
Mathias Stochip Atuarfiani 6. a aamma b ajugaatinneqarneranni makku tungavilersuutaapput:
Klassit taakku marluk pujortartuunngillat, pujortartartuunerullu periaasia kingunerilu misissorsimavaat, aamma pujormiuutinneqartarnerup kinguneri misissorsimavaat kiisalu meeqqap alliartornerani pujortarnikkut akornusersuutaasartut, peqqissusaanut, qiimassuseqarneranut ilikkagaqarnissaanullu pujortartarnerup kinguneranik meeraanermi inuusuttunngornermi kingornalu inersimasunngornermi ajoqusiisarneri.
Tamakku saniatigut atuaqatigiit aamma misissorsimavaat pujortarunnaarnissamut pujortanngiinnarnissamullu periarfissat. Taamaalioreeramik kingorna innuttaasunut Sermer-miuni suliniuteqarsimapput pujortartarnerup ajoqusiisarnera pillugu paasititsiniaallutik, neqerooruteqarsimallutillu meqquteeqqanik kapuuinikkut pujortarunnaarsartinnermik.
Aamma pujortarunnaarniartunik eqimattanik sapaatip akunneranut ataasiarlutik naapittartunik pilersitsisimapput. Aammattaarlu januarip qiteqqunnerani pilersaarutigivaat in-nuttaasunut pujortarunnaarniartunut pikkorissaasoqassasoq. Innuttaasullu pujortarunnaarniarlutik pikkorissarnissaannut meqquteqqaanillu kapoortillutik pujortarunnaarniar-nissaannut allatsinniassammata novemberimi decembarimilu marlunngornerit tamaasa allagartanik illoqarfimmi agguaasarsimapput, kiisalu lokalradiomi KNR radiokkullu aalla-kaatitsisimallutik.
Atuaqatigiit marluullutik naammaginartumik nalunaarusiorsimapput, suliniutaasimasut siamasissumik ataqatigiissaarneqarsimallutik aammalu ersarissumik suliassat atuartut akornanni naammassilluarneqartarsimallutik. Atuarfiup nalinginnaasumik atuartitsineranut fagit akimorlugit akuliussuunneqarsimallutik.
Atuaqatigiit piareersarluarsimanerminni atuarfimmi avatangiisaasut, illoqarfimmi innuttaasut assigiinngitsunillu suliaqartut ilaatilluarsimavaat.
Ukioq manna atuaqatigiit 7-t unammisitsinermi peqataasimapput. Katillugit atuaqatigiit 8-t peqataaniarlutik nalunaarsimapput nalunaarusianillu unammissutaasussanik nassitsi-simallutik. Atuaqatigiit ataatsit unammisitsinermi piumasaqaatit naammassisinnaanngimmatigit unamminermit taamaatittariaqarsimapput, tassami atuaqatigiit akornanni suli pujortartartoqarsimammat.
PAARISAp upernaamut Atuaqatigiit Pujortartuunngitsut 2011 atuartunut akullerniittunut unammissutigiteqqissavaa. Ajugaasunut eqqugassaassaaq 30.000 kruunit.