Kiisami dronningi takkuppoq
Dronning Margrethe oqaluttuarpoq kunngissap nulia Mary marlulissallu inunngoqqammersut ajunngitsut
- Ukuara ajunngippasissorujussuuvoq meeqqallu aamma taamaapput, dronning Margrethe Rigshospitalimi erniffimmut pulaareerluni oqarpoq.
Dronning Margrethep arfininngormat ualikkut ernutartaani marluk takuniarpai. Rigshospitalimit anigami oqaluttuarpoq arnaat marlulissallu ajunngitsut.
Rigshospitalimut takkukkami kiilerimi isertarfikkut iserpoq torsuusarsuarmi tusagassiortorpassuit aqqusaarnagit. Anigamili apeqquterpassuarnut akissuteqarpoq.
Ilaatigut tusagassiortup tuluttut oqaluttup paaserusuppaa dronningi atissaannut siunnersuuteqarnersoq.
- Naamik siunnersuutqanngilanga, Danmarkimilu ileqquunngilaq meeqqat atsertarnerat qaammatinik marlussunnik utoqqaatigilersinnagit, dronningi oqarpoq.
Ilanngullugu oqaluttuaraa tunissutissaarannguamik nassarsimalluni, sunaanersorli isertuussaasoq.
Christian Isabellalu angerlarsimaannarput
Prins Christian nuappoq qatanngutertaanilu pulaarsinnaanagit. Aamma Isabella angerlarsimaannarpoq.
Angajunngorneq angisuujuvoq prins Christialli, 5-inik ukiullip, arfininngornermi qatanngutertaani pulaarsinnaanngilai.
Taanna nuappoq taamaattumik aalajangerneqarpoq Amalienborgimi angerlarsimaannassasoq.
- Napparsimalaarpoq maanngarnissaanullu tunngavissaqanngilaq, Lene Balleby, kunngikkormiuni attaveqarnermut pisortaq oqarpoq.
- Nammineq peqqissusia pissutigalugu aammattaarli inunngorlaat pissutigalugit, taanna oqarpoq.
Aamma Isabellap qatanngutertaani takunngikkallassavai, animisut Amalienborgimiiginnarpoq.
Maryp angutaata John Donaldsonip rigshospitalimut pulaarnermini Christianip nuannera oqaluttuaraa. Ulloq naallugu Christian Isabellalu aanaminnik Amalienborgimi Frederik VIII´s palæ-mi nutarterneqaqqammersumi paarineqarput.
Juullip siuninngua ilaqutariit tassunga nuupput.
/ritzau/
Tilbage