Siumup ukiortaami oqaaseqaataa

Ilaqutariit aalisartukkormiut piniartukkormiullu kiisalu aatsitassarsiorneq Siumup ukiortaami oqaaseqaatimini sammivai.

Aleqa Hammondip ukiortaammi oqaaseqaammini 2009-miit qinersisartunik isumasiuinerit sammivai, taakkunani Siumut qinersisartunit siuariartinneqarluni. Ass.: Leiff Josefsen

Siumup siulittaasuata Aleqa Hammondip ukiortaami oqaaseqaataa tamarmiusoq:

"Siumut sinnerlugu innuttaasut tamaasa ukiortaami pilluaritsi!

Ukioq pisoqarfiusimaqisoq puigukkiussassanillu misigisaqarfiusimaqisoq qaangiutilerpoq.

Akornatsinni misigisanut pitsaasorpassuarnut qujamasuuteqassalluni tunngavissaqarpoq aammalu pissutissaqarpugut kikkunnut tamanut Kalaallit Nunaata ineriartortuaannarnissaanik annertuumik suliniuteqartunut annertuumik qutsaveqarnissatsinnut. Ilinniagaqartorpassuit tamaviaarput siunissamik eqqaasinniarluta tamakkualu pinngitsoorsinnaanngilavut siunissamik suliniuteqarnitsinni, ilinniakkaminnillu naammassinnittorpassuit pilluaqqorusuppavut. Amerlanerusut ukiumi aggersumi ilinniagaqarfinnut nutaanut qinnuteqartussat neriulluarfigaavut, neriuppungalu uagut angajoqqaatut qitornatta pitsaasumik ilinniagaqarnissaannut pitsaasunik tunuliaqutsiisinnaasugut.

Ilaqutariippassuit aalisartukkormiut piniartukkormiullu erloqinartumik atugassarisaat Siumumi arajutsisimanngilluinnarparput. Suli naatsorsuutigisinnaavarsi Siumup sulissutigiuarniaraa Kalaallit Nunaanni partiiunissani katersuuffiusoq, sumi najugaqaraluaraanni sumillu suliaqaraluaraanni. Naatsorsuutigisinnaavarsi sapinngisamik amerlanerpaanut pissutsit pitsaanerulernissaat sulissutigissagipput.

Aningaasartuutit qaangeruminaatsut qaangerniarlugit sulisartutut akunnattumillu aningaasarsialittut ataatsimoortariaqarpugut ataatsimoorlutalu ataatsimut anguniagaq anguniarlugu. Pitsanngorsaanermut annertuunik suliassarpassuaqarpugut. Sulinitsinni qitiulluinnarpusi ukiumilu nutaami suli qaninnerullusi suliniassaagut.

Ilanngullugu ukioq manna soraarninngortorpassuit qutsavigerusuppavut. Qularutiginngilarput qitornatsinnik isumassuinitsinni pitsaasumik tunuliaqutsiinersi ingerlatiinnassagissi ilaqutariinnillu nukittorsaallusi.

Ukiuni makkunani, aatsitassarsiornerup aallartisarnerani ineriartortinneqarneranilu Kalaallit Nunaanni innuttaasut tamanna qaqugumulluunniit pissarsiffigissavaa. Namminersorlutik Oqartussat eqqunneqarnerisigut nunap ataanik piginnittunngorpugut tamannalu suliatta ingerlateqqinnerani qitiussaaq. Piginnittut annerpaamik pissarsissapput isumaliutillu tamarmik aallaaveqartariaqarput innuttaasut pissarsiassaminnik pissarsinissaannik, soorluttaaq innuttaasut qitiusumik inissisimasariaqartut pisuussutit tamakkua atorneqarneranni.

Siumup isumaa ersarippoq: Kalaallit Nunaat ineriartortinneqassaaq periarfissat, pisuussutit innuttaasunut tunniussaasa atorluarnerisigu, anguniagariuassavarpullu silatuumik atuinissaq, innuttaasunut avatangiisinullu toqqissisimanartumik.

Kalaallit Nunaanni maani ileqquvut tunngavigullu tamatigut aalajangiusimaniartarpavut allanit peqarnerugutta pikinneruguttaluunniit, tassa allat inuunermi ikiorlugit. Politikkimik sulinitsinni aalajangiisuuvoq ineriartornermik pilersitsinissaq inuiaqatigiinni kikkunnut tamanut iluaqutaasumik. Aningaasarsiornermik peqqissumik pilersitsisariaqarpugut pisuunut piitsunullu iluaqutaasumik inuussutissarsiutinillu pissarsiffiusunik pilersitsisumik. Kalaallit Nunaanni akileraarutitigut artukkiineruneq aqqutissat siullersarissanngilaat, inuiaqatigiilli qanorluunniit aningaasarsioraluarpata arlaannarpulluunniit anginerusumik akiliisariaqanngilaq inuiaqatigiinni inissisimanerput suliavulluunniit pissutigalugit, ineriartortitsinermilli pilersitsisariaqarpugut tamatsinnut iluaqutaasumik. Isumaga tamanna allanngortitassaanngilaq Siumumilu ukiumi nutaami tamaviaarutigeqqissavarput aningaasarsiornermik aalajaatsumik ineriartortitsineq, kikkunnut tamanut iluaqutaasumik.

Siumumi isumaqarpugut Kalaallit Nunaat aningaasarsiornikkut, pisuussutitigut inuttullu periarfissarissaartoq.

Inuusuttut ilinniagaqartut amerligaluttuinnarput siunissamilu sulisunik avataanit tikisitsisarnissamik killiliillutik. Ineriartorneq ingerlavoq inuiaqatigiinnut imminut napatittunut, takutitsisumik Namminersornerullutik Oqartussat eqqunneqarnerisigut suliat pitsaasumik inerneqarsimanerannik, tamannalu tulluusimaarutissaraarput.

Aatsaat taama Kalaallit Nunaannut pingaaruteqartigaaq inuiaqatigiinni pingaarutilittut ilaasutut misigisimanissaq qaangiinnarneqarani, Kujataani, Qeqqani, Avannaani Tunumiluunniit najugaqaraluaraanni. Oqaratta suliassat ingerlannissaannut kikkut tamarmik atorfissaqartinneqartut, taava aalajangiisuusumik pingaaruteqarpoq suliassat tunniunnissaat inuussutissarsiornermilu perifissanut nutaanut ammaassilluni, ineriartornerullu aammalu nutarterinerup ingerlatiinnarnissaannut aningaasanik atugassaqartitsilluni. Innuttaasut qanimut suleqatigalugit, tusarniarlugit, siunnersorlugit oqaloqatigalugit, pingaarnerpaamillu atugarisaat isumaallu paasillugit.

Atortussat pingaarnerpaat tassaapput ataatsimut anguniagaqarnerit, anguniakkallu anguniarlugit paaseqatigiinneq. Angusassat annerpaat anguniartigit sulinermi tamatumani innuttaasut qitiutillugit innuttaasunullu angusassanik pitsaanerpaanik angusaqarta.

2009-mi qinersinerup kingorna qinersisartunik isumasiuinerup aappaani kisitsisit takutippaat Siumut partiini kisiartaalluni siuariartoq. Ineriartorneq tamanna nalilerusupparput tassuuna uppernarsarneqartdoq qinersisartut tatigigaat anguniakkatsinnik attassinerput tunngavigisavullu tunulliutinngikkivut, tunuliaquttavullu ilumoornerannut qutsavigerusuppavut, minnerunngitsumik sulinitsinni isummaminnik tapersersuisut.

Naatsorsuutigisinnaavarsi angusarissaarniarluta pissarsiniarlutalu sulinerput nangissagipput, suliattalu ingerlateqqinnerani peqataanissassinnut tikilluaqqusaavusi. Kikkunnut tamanut ukiumut qaangiuttumut qujanaq, nunatsinnilu sineriassuatsinni kikkut tamaasa ukiortaamik pilluarnartumik kissaappavut."

Powered by Labrador CMS