Kujallermi akileraarut qaffassaaq
– Akerlianik sullissineq ajorseriassanngilaq, Simon Simonsen oqarpoq
Kommune Kujallermi kommunimut akileraarut aappaagu 1 procentimik qaffassaaq 28 procentinngorlugu, taamaasilluni kujataani akileraarut tamarmiusoq 45 procentinngussalluni.
Borgmester Simon Simonsen suliffissaaleqisoqaraluaqisoq innuttaasullu ikiliartoraluartut isumalluarpoq: – Naatsorsuutigaarput piffissap sivikitsup ingerlanerani kommunimi aatsitassarsiortoqalissaasoq, taamaasilluni ullimikkuminngarnit annertunerujussuarmik aningaasatigut imminut napatissinnaalissalluta. Akileraarutit qaffaataat, 2011-mi aningaasaqarneq ataqatigiissinniarlugu ingerlattariaqarsimasarput, aatsitassarsiortoqalerpat peerneqaqqissaaq.
Kommune Kujallermili sullissinerup pitsaassusia attatiinnarniarlugu akileraarut qaffattariaqarsimavoq: – Kontut tamaasa misissoqqissaarsimavagut illersorneqarsinnaasumilli sipaarutissanik amerlanerusunik nassaarsinnaasimanngilagut, Simon Simonsen sermitsiaq.ag-mut oqarpoq.
Missingersuut isumaqatigiissutigaat
Kommune Kujallermi kommunalbestyrelsip isumaqatigiissup tallimanngormat ualikkut 2011-mut missingersuut akuersissutigaat.
– Qaammatini kingullerni missingersuummik sulinitsinni kommunimi ingerlatsinermi sammisaqarfinni arlalissuarni annertuunik sipaaruteqarsimavugut, iluatsissimavarpullu meeqqat inuusuttullu kiisalu utoqqaat inuiaqatigiinnilu sanngiinnerit sipaarfigineqannginnissaat, Simon Simonsen oqarpoq.
– Sullissiinerup pitsaassusia annertunerusutigut attatiinnarneqarpoq, isumaqarpungalu akileraarutip qaffanneqarnera innuttaasut paasissagaat sullissinerup pitsaassusia attatiinnarneqassammat, atuartunik nerisaqartitsineq atuartullu angalasarnerat sipaaruteqarfiginagit. Sammisaqarfinni arlalinni sipaaruteqartoqaraluartoq soraarsitsinissat pinngitsoorsimavagut, tassa tamatumani sipaarutissat pissammata nalinginnaasumik atorfimmit tunuarnermut atatillugu.
Sanaartornermut atugassat annikitsut
Sanaartugassatigut Kommune Kujalleq 2011-mut aningaasanik annikitsuinnarnik immikkoortitsisimavoq: – Tamannali takuneqassaaq kommunimi sanaartugassanut allanut ataqatigiissillugu, soorlu illoqarfinni pingasuni tamani atuarfiit nutarterneqarnissaat inuussutissalerinermillu ilinniarfiup Inuili-p allineqarnissaa, Simon Simonsen oqarpoq.
Kommune Kujalliup naatsorsuutigaa naalakkersuisut qanittukkut akuersissutigissagaat Nanortalimmik atuartunut najukkamik nutaanik sanasoqarnissaa Qaqortumilu utoqqaat illuata allineqarnissaa. Tamanna peqatigalugu pilersaarutaavoq Qaqortumi pinerluuteqarsimasunut inissiisarfiup allineqarnissaa.