Sulineq namminerlu inuuneq immikkoortikkuminnaappat

Inunnik isumaginninnermik suliallit aaqqiagiikkunnaartitsiniartarnermik ilinniagaqarput.

Inuiaqatigiinni ikittuinnarnik inulimmi sulitaq naaperiaannaavoq, soorlu pisiniarfiliarnermi. Nuummi inunnik isumaginnittunngorniarlutik ilinniagaqartut siulliit naammasseqammerput, taakkulu aaqqiagiinngissutaasinnaasunik iluarsiinissaminnut atortussaqarnerupput.

Isumaginninnermi siunnersortittut meeraq pinngitsaaliissummik angajoqqaavinnit qimagutsinniaraanni, taannalu inissiiffissani inissaqartinneqanngippat qanoq iliortoqassava, taava meeraq nammineq angerlarsimaffimmut angerlaatiinnarneqassava? Imaluunniit sumiiffimmi innuttaasut ima ikitsigippata, taava ullut tamaasa angajoqqaajusut eqqorneqarsimasut aqqusinermi imaluunniit pisiniarfimmi naapittaraanni?

- Ilisimasatsinniit ajornartorsiut tamanna Kalaallit Nunaanni annertunerujussuuvoq. Inunnik isumaginninnermik sulialik sakkortuumik aalajangiippat, taava inuit nammineq misigisartagaat taamaatut nalaanneqartarpiut. Tassami imaappoq suliffimmik avataanni taamatoqqissaaq nalaataqartarput, Claus Arne Hansen oqaluttuarpoq, Metropolimi inuiaqatigiit pillugit ilisimatusarnermi lektoriusoq, kalaallinik inunnik isumaginninnermik suliaqartunik ilinniartitseqqiinermik ingerlatsisartuusoq.

- Tamanna atugassarititaasoq inuiaqatigiinni ikittuinnarnik inoqartuni qitiusorujussuuvoq, taamaattumillu sulineq aamma nammineq inuuneq immikkoortikkuminaatsorujussuuvoq, tamannalu pissutaalluni oqartussaasutut inissinnissamut ajornartorsiutinngortarpoq. Taamaattumik susinnaajunnaarsinnaapput kiisalu akuerisassarinngisaraluarminnik akuersaarinnissinnaasarlutik.

Ilinniagaqaartut siulliit naammasseqqammerput, kisalu Claus Arne Hansen ilinniartitsinerminut tunngatillugu aatsaat taamak pitsaatigisunik amerlatigisunillu nalunaruteqarfigineqarpoq.

- Ilinniagaqartut sulinerminnut tunngatillugu atortussaminnik nutaanik pissarsinertik assorsuaq nuannaarutigaat aamma siusinnerusukkut iliuuserisartakkaminnik takunnissinnaalersinneqaramik. Suliaminnut tunngatillugu qularunnaarnerulerput, taamaalillutik ilinniakkatik tunngavigalugit eqqortumik aalajangiinissaminnut tunuarsimaarunnaarlutik, Claus Arne Hansen oqarpoq.

Powered by Labrador CMS