Agathe: Kalaallit Nunaanni tarnip nappaataanut nakorsat naammappput
Peqqissutsimut Naalakkersuisup Astrid Fleischer Rexip peqqinnissaqarfimmi tarnip napaataanut nakorsaqarnermut tunngatillugu amigaateqartoqarneraanera isumaqaqtiginngilaa.
- Peqqinnissaqarfipput tarnip nappaataanut nakorsaqarnermut tunngatillugu ajorpoq. Aningaasaliissuteqaqqinnikkut tamanna aatsaat iluaquserneqarsinnaavoq, apeqqutaavorli sulisussanik piginnaasalinnik pissaqarnersugut - tamatumani unga tarnip nappaataanut nakorsat eqqarsaatigaakka.
Demokraatit inatsisartunut ilaasortaatitaat Astrid Fleischer Rex sapaatit akunneranni kingulermi taamak oqarpoq.
Nammineq iliuusissaaruteqqasutut misigisimavoq inuiaqatigiit inunnik tarnimikkut nappaateqartunik eqqumaffiginnissinnaaneranut aamma ikiuisinnaaneranut tunngatillugu.
- Uanga ilisimavara nunami maani tarnimikkut nappaateqartoqartoq pisariaqartitsinertik tunngavigalugu ikiorneqanngitsunik, tamakku ilaquttaminnut naviarnartorsiortitsipput pigisanik aserorterisarput aamma ima assujt artorsartitsisartigaat, ilaqutaasa politiinut tunniuttariaqartarlugit, naak taamak iliornertik artorsaatigigaluaqalugu. Taamaattorli politiit qanoq iliuusissaaruteqqasarput, tassami tarnimigut napparsimasoq pineqarmat, Astrid Fleischer Rex oqarpoq.
Peqqissutsimut Naalakkersuisoq Agathe Fontain isornartorsiuinermut maannakkut tusagassiutitigut nalunaaruteqarluni akissuteqarpoq.
Miserratiginngilaa tarmikkut nappaateqartut pisariaqartitartik tunngavigalugu ikiorneqartanngitsut politiinit tigusarineqartarnerat.
Tarmimikkut napparsimasut nappaatiminnik katsorsarneqarnissartik kissaatiginngippassuk, napparsimaveqarfiup taamaallaat napparsimasoq ajugaaniarfigiinnarsinnaavaa. Napparsimasullu nappaatimik katsorsarneqarnissani suli kissaatiginngippagu, taava isumaginnittoqarfiit akulerutsinneqarnissaat pisariaqarsinnaavoq ilaatigullu politiit napparsimasoq qunusaarisutut pissusilersoraangat. Pinngitsaaliissummik napparsimavimmut unitsitsineq pisariaqarpat maannakkut politiit, peqqinnissaqarfiup aamma isumaginnittoqarfiup qanoq suleqatigiinnissaat erseqqissunik maleruagassaqareerpoq, Agathe Fontain nassuiaavoq.
Peqqissutsimut naalakkersuisup Astrid Fleischer Rexip tarnip nakorsaanik amigaateqarneraarluni isummersornera isumaqatigingilaa.
- Peqqinnissaqarfimmi sulisussanik pisariaqartitsinermut atatillugu Astrid Fleischer Rex-imut ilisimatitsissutigisinnaavara, peqqinnissaqarfik tarnip nakorsaanik amerlassusii naammattunik peqarmat tarnimikkut napparsimasunik sullissisinnaanermut tunngatillugu, Agathe Fontain oqarpoq.
Astrid Fleischer Rexip aammattaaq siunnersuutigaa, nipituumik atuffassisarnissamik, qalipaasarnissamik aamma erinarsornissamik inuit uternermik, nikallunganermik aamma Alzheimersimik eqqugaasimasunut, assigiinngitsunik neqerooruteqartoqassasoq.
- Siunnersuutit pitsaapput, kisianni tamakku inunnik isumaginninnermut tunngasuupput imaluunniit tarnimikkut napparsimasunik sammisaqartitsinisamut tunngallutik, tamakkulu peqqinnissaqarfiup napparsimasunik katsorsaanissamik neqerooruteqarsinnaanerata avataaniipput, Agathe Fontain naqissusiivoq.