Nammineq pigisamik ineqalernissaq ajornarpallaaqaaq
Olga P. Bertheseln IA isumaqarpoq piginneqatigiilluni inissiat amigaataanerat pissutaalluni illoqarfiit annerit sisamat akornanni nuttarsinnaaneq annikillisinneqartoq.
- Ullumikkut tamanna taamatut itsillugu inunnut illoqarfiit annerit sisamat avataanni najugaqartuusunut nammineq pigisamik ineqarfeqalernissaq ajornartippaa.
Taamatut qularnaarisoq tassaavoq Inatsisartunut ilaasortaq Olga P. Berthelsen (IA), Naalakkersuisunut paragraf 36 tunngavigalugu apeqquteqaateqarnermini.
Inuit namminneq pigisaminnik ineqalernissamut kissaateqarnerannut tapertaliullugu piginneqatigiilluni inissiat agguaanneqarnerisa kinguneriisassaat ernumanartoqartippaa.
- Nunatsinni illoqarfinni annerni sisamani illuliornermi/inissialiornermi realkreditforeningit aqqutigalugit sanaartortitamut akiliutissat ilaat aningaasalersortinneqarsinnaapput. Taamaaliornikkut nunami aningaasaliisarnermi pisussaaffiit ilaat oqilisaassisoqarpoq. Illoqarfiit annerit avataanni najugaaraanni taamaallaat marlunnik periarfissaqarpoq. Illussaq nammineq tamakkiisumik aningaasaaliissuteqarnikkut taamaallaat pisiarineqarsinnaavoq kiisalu Namminersorlutik Oqartussat aqqutigalugit sanaqataalluni illuliortoqarsinnaavoq. Pissutsit tamakku allanngortinniarlugit iliuuseqartariaqarpugut, tassami kikkulluunnit sumi najugaqarnissartik namminneq aalajangertussaammassuk, Olga P. Berthelsen, apeqquteqaatiminut tunngavilersuilluni allappoq.
Apeqquteqaammi pineqarput illoqarfiit sorliit piginneqatigiilluni inissialiornissanik pilersaaruteqarfiunersut, taamatut pilersaarusiornermi agguataarinermi suut tunngavilersuutaanersut, illoqarfinni allani piginneqatigiilluni inissialiornerni Illutt A/S qanoq atorneqarniarnersoq kiisalu inatsit tunngavigineqartoq sorliunersoq.