Inatsisitigut ataataqanngitsut aaqqiissuteqarfigineqanngillat
Kalaallit Nunaanni meeqqat uersakkat inatsisitigut inissisimanerannut ministeriuneqarfiup misissuisitsisimanerata sukumiisuunnginnera Politikenimit isornartorsiorneqarpoq.
Nunatsinni 1950-ikkunni 1970-ikkullu tungaanut meeqqat inunngorsimasut ataatalerneqarsimanngitsut inatsisitigut inissisimanerannik oqallinnermi misissuinermilu sakkortuumik isornartorsiuisoqarpoq, Kalaallillu Nunaanni 'meeqqat inatsisisitigut ataataqanngitsut' qassiunersut suli ilisimaneqarani.
Kalaallit Nunaanni uersakkat inatsisitigut inissisimanerat pillugu Statsministeriaqarfik novembarimi attuumassuteqanngitsumik misissuisitsilerpoq – oqaatigineqartutut Namminersorlutik Oqartussat oqaloqatigereerlugit. Suliassiissut malillugu qulaajaanermi 1914-imiit 1962-imi, nunatsinni meeqqanut inatsisip atuutilernerata tungaanut, atuutilerneratali nalaaniunngitsoq, meeqqat uersakkat inatsisitigut inissisimanerat qulaajarneqassaaq.
Qulaajaaneq killilerujussuussaaq annerpaamik 60-inik qupperneqassalluni, piffissamillu killiliinerup saniatigut aamma killilerneqarsimalluni qallunaat kalaallillu oqartussaasuisa isumaliutaannik attaveqarnerannillu oqaluttuarisaanikkut allaaserinninnerussalluni.
Akerlianik qulaajaanikkut siusinnerusukkut maannalu malittarisassat misissorneqassanngillat, aammalu sunniuteqaat misissorneqassanatik malittarisassanillu imaqanngilluinnarluni uuttuutitut atorneqarsinnaasunik.
Taamaasilluni tunngavissaqarpoq qularnartoqartissallugu qulaajaanikkut maanna ajornartorsiutaasut, Kalaallit Nunaanni »inatsisitigut ataataqanngitsut« annertusigaluttuinnartumik taakkartorsimasaat, aaqqinneqarsinnaanersut.
Tassa Kalaallit Nunaat suli nunat tamalaat periusaasa avataaniitinneqarpoq, tamakkunani meeqqat katissimasunik katissimanngitsunillu angajoqqaallit naligiisinneqarmata – aammalu qulaajaaneq kinguneqarnaviarani »inatsisitigut ataataqanngitsunut« inatsisitigut pitsaanerusumik inissisimalernissaat.
Sermitsiap uani saqqummiussaa tassaaginnarpoq Jens Brøstedip ilisimatuup allaaseritaanit tigulaagaq.
Nunatsinni inatsisitigut ataataqanngitsut naligiissataanissartik kinaassesilerneqarnissartillu kissaatigaat. Apeqqutaalerporlu misissuisitsineq ministeriuneqarfimmit aallartinneqartoq tamatumunnga alloriarnerunersoq siulleq.