Ukioq saarullikiffiusoq
Saarulliit 2009-mi akilussimapput ikissimallutillu. Qalerallit, saattuat raajallu tunineranni nalingi pitsaanerupput, tamanna kisitsisinik paasissutissat nutaat takutippaat.
Ukioq 2009-mi aalisakkanik qalerualinnillu tunisat tamarmiusut ikileriarput, artilli allat soorlu qalerallit saattuallu tunineqartut amerleriarput.
Taamatuttaaq tunisat nalingat qaffariarput. Qalerallit, saattuat raajallu tunineranni agguaqatigiissillugu nalingat qaffariarpoq, saarulliit tunisat nalingat appariarujussuarlutik. Nunatta eqqaani avataasiorlutik aalisartut qaleralittaat amerleriarput, raajanik saarullinnillu pisaat appariartut.
Taamatut allappoq Kalaallit Nunaanni Naatsorsueqqissaartarfik atuagassiap "Fiskeri og fangst 2009" nanginneratut nalunaarummini, taannalu Kalaallit Nunaanni Naatsorsueqqissaartarfiup quppernerani nittartakkami www.stat.gl tamanut saqqummiunneqaqqammerpoq.
Kisitsisit takutippaat qalerallit tunisat 6 procentimik amerleriarsimasut, taamaasilluni qalerallit 2009-mi tunineqartut 20.618 tonsiullutik.
Raajat tunineqartut ukiumut siulianut sanilliullugu ikileriarput. 2009-mi 62.566 tonsit tunineqarput, tassa ukiumut siulianut sanillullugu 7 procentimik ikilerlarlutik.
Saattuat tunineqartut amerleriarput ukiuni siuliini marlunni aalajaassimagaluarlutik. 3.112 tonsit tunineqarput, tassa 2008-mut sanilliullugu 43 procentyimik amerleriarlutik.
Saarulliit tunisat ikileriarujussuarput ukiuni kingullerni amerliartortuarsimagaluarlutik. 2009-mi saarulliit 7.790 tonsit tunineqarput, tassa 2008-mut sanilliullugu 36 procentimik ikileriarlutik, tabel 1 naapertorlugu.
Kisitsisinik takussutissiissummi, aamma Naatsorsueqqissaartarfiup quppernerani nittartakkami takuneqarsinnaasumi, tunisat amerlassuaat artillu akii 1987-imiit 2009-mut qaammatikkaartumik nunallu immikkoortukkaartumik takuneqarsinnaapput.