Isikkivilunneq timmisartuussinermik akornusersuivoq
Sineriak tamaat suli kinguaattoortoqarpoq, Air Greenlandili nunap iluani timmisartuussinermut pilersaarusiorpoq ilaasut tamaasa apuunniarlugit.
Silarlunnera apingaatsiarneralu isikkivilunneralu pissutigalugit ataasinngornermik ullaap tungaani tamarmi timmisartuussineq akornusersorneqarpoq sinerissamilu tamarmi suli kinguaattoorfiulluni.
Air Greenland nunap iluani timmisartuussinermut pilersaarusiorpoq taamaasilluni ilaasut tamarmik ullup ingerlanerani sumunngarfiannut apuunniarsaralugit, timmisartortitseqatigiiffik tusagassiorfinnut nalunaarummi allappoq.
Atlantikoq qulaallugu timmisartoq Danmarkimut utissaaq Kangerlussuarmit nunatta nalunaaqutaa malillugu nal. 18 timmissalluni Københavnimullu tikissalluni qallunaat nalunaaqutaat malillugu nal. 02.20.
Kinguaattoornerilli pissutigalugit assartukkat qularnanngitsumik ullumi apuunneqarsinnaanngillat, tamatumunngalu aaqqiissutissarsiorluni sulisoqarpoq, Air Greenland paasissutissiivoq.