Skip to main content

Kuupiup Juntaamut eqqaniutaa

Naalakkersuisut siulittaasuata Kuupik Kleistip Jonathan Motzfeldtip ilisaanerani oqalugiaataa uani atuaruk.

Kuupik Kleist, Naalakkersuisut siulittaasuat Nuummi, novemberip ulluisa tallimaanni 2010

Inatsisartut Naalakkersuisullu siulittaasorisimasaata Jonathan Motzfeldtip (1938- 2010) ilisaanerani eqqaaniutit

Asasara ikinngut Junnuk,

”Suut tamarmik aalajangersimasumik piffissaligaapput,

qilaammi ataani pisartunut tamanut piffissaq

aalajangersimasuusarpoq. Inunngorfissaqarpoq

toquffissaqarlunilu. Naatitassanik ikkussuiffissaqarpoq

ikkussukkanillu nutsuiffissaqarluni.”

”Alittuiffissaqarpoq mersuiffissaqarlunilu.

Nipangersimaffissaqarpoq oqaluffissaqarlunilu.

Asanniffissaqarpoq uumiginniffissaqarlunilu.

Sorsuffissaqarpoq eqqissivissioqatigiiffissaqarlunilu.”

Junnuk, Biibilimi oqaatsit taakkorpiaat ilinnut pigitittarpakka. Oqaatsillu taakku imaannaangitsunik nalaataqarfinni issuarniartarpatit.

Oqaatsit inuup kinaaneranik ilumoortumik oqaluttuartut inuunerup aqqutaani qanorluunniit pisoqaraluarpat inuit saammaasseqatigiittariaqarnerannik paasisariallit – suummi tamarmik aalajangersimasumik piffissaligaapput.

Oqaatsit inuttut ilinnut ilisarnaataaginnaratik aammali tamatsinnut inuunitta ingerlanerani najoqqutassatut ingerlateqqitassaqqissuupput – qilaammi ataani pisartunut tamanut piffissaq aalajangersimasuusarpoq.

Ilumummi ilinnut qujassutissarpassuaqarpugut.

Qujavugut nunatsinnut ernerulluarlutit inuiaat kalaallit nammineernerulernissaat aqqutissiueqataaffigisimagakku, immitsinnut tatigaluta ataasiusutullu misigaluta - minnerunngitsumillu qujavugut illit Junnuk ulluni atorsaasuni ullunilu assoralisimaarfiusuni peqatigisarsimagatsigit – tassami sorsuffissaqarpoq eqqissivissioqatigiiffissaqarlunilu.

Ikinngutitta Junnuup – Jonathan Motzfeldtip – nunatta oqaluttuarisaanerani Inatsisartut Naalakkersuisullu siulittaasorisimasaasa siullersaasa nalitsinnilu ukiuni imaannaanngitsuni anersaakkut, naalakkersuinikkut allarpassuartigullu siuttorisimasatta ullumi naggataamik qaniornerani ikinngutitut Naalakkersuisut sinnerlugit taamatut naatsumik oqaaseqalaarpunga.

Junnuup toqunerani ullumilu ilisaanerani misiginneqataanerput matumuuna uillarneranut Kristjanamut, qitornaanut ilaqutaanullu tamanut apuukkusuppara.

Qujavunga nunatsinniit nunaniillu allanit maanga inuulluaqqusiartoqataallutik najuukkiartortunut tamanut, qujavungalu misiginneqataanermik tuppalliutigisatsinnik apuussaqartunut tamanut.

Asasara ikinngut Junnuk qujanarsuaq tamanut, apuuffissannut angalalluarna. Jonathan Motzfeldtip eqqaaneqarnera ataqqinartuuli.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER