Alcoa utaqqiisaa
Pingasunngornermi ualilluarnerani Inatsisartuni tamakkiisumik oqallinneq.
Alcoamut suliassaq qiteqqunnerani Inatsiartut Maniitsup eqqaani suliffissualiornissamut nalunaarusiat misissueqqissaarnerillu ikinngitsut misissorsimavaat.
Pingasunngornermi oqaluuserisassani kingulliussaaq inuutissarsiornermut aatsitassanullu naalakkersuisup Ove Karl Berthelsenip (Inuit Ataqatigiit) suliap killiffia pillugu nalunaarusiaa, misissuisimanerit tunngavigalugit, ingammik avatangiisinut tunngatillugu.
Inatsisartut oqallinnermi tunngavissaqarluarput, suliffissualiornissamullu peqquteqartunik inatsisissat marluk nutaat akuersissutigineqarsimapput. Tamarmillu anenrtuummik oqallisigineqarput.
Upernaaq eqqissisimatitsinissamut inatsit akuersissutigineqarpoq, tassani kulturikkut oqaluttuarisaanitsinni eriagisassanut suliffissuaqarneq salliutinneqarluni. Nunatta Katersugaasivia toqqorsivialu sakkortuumik akerliuvoq: Tasersiami kulturikkut eriagisassat erngup nukuliorfiliornikkut ullunneqartussat ataannertariaqarlutillu eqqissisimatinneqartariaqarput. Ullumikkulli pissutsinut qanga pissutsinut ajugaapput, inuutissarsiornermilu suliat inuiaqatigiit ineriartornerannut tunngasut salliutinneqartairaqraput.
Ippassaaq naalakkersuisooqatigiit illuatungiliuttut kamaatigeqisaannik akileraartarnermut inatsit nutaaq akuerissutigaat, suliffissuartigut Alcoap aluminiuliorfiliorfiatut ittunut isertitat nunatta karsuanut nakkartalissallutik kommunip karsianut pinnatik. Karl Lyberthip Siumumeersup inatsit kommunip nammineersinnaaneranut saassussinertut taavaa. Kaali Olsen, Inuit Ataqatigiit, isumaqarpoq nunatsinni ataatsimoorluta pisuussutivut nunatta karsianut nakkartariaqartut.
2012-mi aalajangiisoqassaaq
- Ualimut oqallinnermi aluminiuliorfissap ingerlariaqqinnissaanut tunngaviliissaaq,Ove Karl Berthelsen oqarpoq.
2011-mi naalakkersuisut suliami sanaartornissaq pilerpat tamanna Inatsisartunut saqqummiutissavaat. Naalakkersuisut Alcoa qinnuigisimavaat suliffeqarnermi kattuffiit oqaloqatigalugit aalajangersaqqullugu, nunanit allaniit suliartorallartussat qanoq akissaateqartinneqassanersut.
Ove Karl Berthelsenip kissaatigaa 2012-mi nunatsinni aluminiuliorfissaq pillugu aalajangiisoqassasoq.