Seeqqorlunnerit maalaarutigiuk
Peqqinnissaqarfimmik pitsaasunik ajortunillu misilittakkatit peqqissutsimut naalakkersuisup tusarusuppai.
Peqqissutsimut naalakkersuisup Agathe Fontainip ukiup ingerlanerani nuna tamangajaat angalasimavaa Peqqinnissaqarfiup aaqqissuuteqqinnissaa pillugu innuttaasunik ataatsimiititsisarluni.
Maanna Nuuk tullinnguuppoq.
- Neriuppunga Nuummiorpassuit innuttaasunik ataatsimiititsinermut ornigukkumaartut. Uannut pingaaruteqarpoq Peqqinnissaqarfiup aaqqissuuteqqinneranik aammalu peqqissutsimut politikkikkut anguniakkanik sulinerup ammasuunissaaq, Peqqissutsimut Naalakkersuisoq Agathe Fontain tusagassiorfinnut nalunaarutikkut oqarpoq.
Taamaattumik Peqqinnissaqarfiup aaqqissuuteqqinneqarnerani suut pineqarnersut paaserusukkukkut novembarip 17-ianni nal. 19.30-imiit 21.30-imut katersortarfimmi innuttaasunik ataatsimiititsinermut orniguttariaqarputit. Saqqummiussinerup kingorna Agathe Fontain apeqquteqarfigineqarsinnaavoq.
- Uannut pingaaruteqarpoq tusassallugu peqqinnisaqarfipput inuit qanoq misigisarneraat, peqqinnissaqarfimmullu tunngasunik qanoq apeqqutissaqarnersut. Innuttaasunik ataatsimiititsinermi oqaloqatiginnittarneq sulininnut atatillugu pingaarutilinnik pissarsiffigisarpara, Agathe Fontain oqarpoq.