Kalaallit sumiginnarneqarsimapput

Tusagassiortup Børsenimilu aaqqissuisuunerusimasup Jan Cortzenip quppernerit 458-it atorlugit nunarput allaaseraa kalaallillu inuiaqatigiit iluaniit asannittumik isornartorsiorlugit.

Ilinniartitaaneq pingaarluinnartuuvoq Kalaallit Nunaat ingerlaqqissappat. Assi: Polfoto

Kalaallit Nunaata siunissaanut ilinniartitaaneq pingaarluinnartuuvoq. Issittumi inuiaqatigiinnguit mianernartut nammineerlutik ingerlatsisinnaassanngillat ilinniartitaaneq ullumikkornit pingaartinneqarnerunngippat.

Taama nunatsinneereerluni tusagassiortoq Jan Cortzen oqarpoq, atuakkiaminilu isummiutiinnakkat naliliipallattarnerillu pinaveersaarlugit. Nunatsinni misigisani atuakkiamini "Den grønlandske drøm: Polarparadiset - Et folk på kant med fremtiden" eqikkarlugit allaaserai.

- Immikkut ilisimasalittut suaarutiginianngilanga, inuiaqatigiinnili kalaallini inuit assigiinngitsut pingaaruteqartut suleqatigalugit Kalaallit Nunaat ullutsinnut tulluarsarsimasoq allaaseraara, Jan Cortzen Ritzauimut nassuiaasoq.

Polarparadiset tassaanngilaq atuakkiortup nammineerluni isummiussai, tassaappulli inuit 33-it isumaat. Tassaapput inuit inuutissarsiuteqartut Kalaallit Nunaanni sivisuumik sulisimasut, inuiaqatigiillu ilisimasaqarfigilluarlugit.

- Inuiaqatigiit kalaallit paasiniassagaanni piffissaqarluartariaqarpoq. Qujanartumik uanga nuliara angalaqatigisinnaavara Maniitsumi aluminiuliorfissaarsuarmik sanasoqarnissaanik piareersaatitut antropologitut atorfeqarmat, Cortzen oqarpoq.

Qulequttat atuakkami Jan Cortzenip sammisai amerlaqaat. Oqaluttuarisaanermik aallartippoq ullutsinnili pissutsinut killipallappoq inuutissarsiorneq, pisortat suliffeqarfiutaat, ataatsimoortumik tapiissutit, naalakkersuineq, inuiaqatigiit inuunerat, takornariaqarneq, ilinniartitaaneq oqaatsillu pingaarnerutillugit allaaserisaqarluni.

- Tusagassiortutut sulininni arlaleriarlunga Kalaallit Nunaat tikeraarsimavara, taamanikkulli takornariatut akisoorsuarmik angalasutut misigisimavunga. Nuliara peqatigalugu Maniitsuliarsinnaaninni periarfissaqarpunga itisiliinissannut, oqaloqatigiinnerillu aqqutigalugit annertuumik paasisaqarlunga, inuit ikittuinnaat misigisimasaannik, oqarpoq.

Cortzenip ilinniartitaaneq uterfigeqqippaa tupassutigisimaqigamiuk. Ilinniartitsisunik 400-nik amigaateqarneq, uniinnartarnerujussuit takkutinngitsoortarnerpassuillu, atuartullu naalagaaniartut tassaapput Atuarfitsialaamik takorluugaqarnermut ungasissupilussuit.

- Innuttaasut 50 procentii sinnerlugit ilinniarsimasuunngippata Kalaallit Nunaat siuariarnissaminut ajornartorsiussaaq. Inuimmi ilinniartinneqarsimannginnerat alianartuuvoq, Polarparadisetimik atuakkiortup erseqqissarpaa.

Innuttaasut sulinissaminnut piginnaasaqanngitsut sarfarsiataaginnartuussapput. Innuttaasut ilinniarsimanngitsuuneranni naalakkersuinikkut siuttut annertuumik akisussaaffeqarput atuakkiortup isumaa malillugu naammassisimanngisaminnik.

Powered by Labrador CMS