PBS-ip atorneratigut akiitsoqartuerutissaaq

Aningaasaqarnermut ataatsimiititaliami Qaasuitsup Kommuniani misilittakkat isiginiarneqarput, taamaalilluni aningaasat innuttaasunit pissarsiarineqarniarsinnaallutik.

Eqqarsartaatsip allanngortinnera maannakullu aamma inatsisitigut PBS-ip atornerani. Taamaaliornikkut akiitsut ikilisinneqarsinnaasut aningaasaqarnermut ataatsimiititaliap neriuutigaa. Assi: Leiff Josefsen

Inatsisartut aningaasaqarnermut ataatsimiititaliaani naalakkersuinermik suliallit Qaasuitsup Kommuniani misilittakkat pitsaasut atorniarneqarput. Tassani PBS atorlugu akiitsullit akiliijumanerlu ajortut akiliisinneqartarput.

Aningaasaqarnermut ataatimiititaliamiittut IA-miit Naaja Nathanielsen aamma Aqqaluaq B. Egede, Demokratiniit Niels Thomsen aamma Siumumiit Per Berthelsen kiisalu Finn Karlsen inatsisiliornermikkut PBS atorlugu akiliisarnissamut isumaqagigiissiortarnissaq pinngitsaaliissutaatikkusuppaat.

Tamanna Qaasuitsup Kommuniani misilittakkanik pitsaasunik tunngaveqarpoq, tassanimi aasap ingerlanerani paasisitsiniaasoqarpoq, kiffartuussisut kommunillu nittartagaani innuttaasut kajumissaarneqarlutik PBS atorlugu akiliisarnissaminnut isumaqatigiissuteqaqqullugit.

Paasisitsiniaanerup kingunerisaanik PBS atorlugu akiliisarnissamik isumaqatigiissutit nutaat amerleriarlutik, kommuni nittartakkamini nalunaarpoq. Taamatullu misilittagaqarneq naalakkersuisunut aningaasaqarnermut ataatsimiititaliap kajumissaarutiginiarpaa.

Pisariaqartitsisoqartoq takuneqarsinnaavoq. Kalaallit tamarmik 14-it sinnerlugit ukioqartut agguaqatigiissillugu akiitsunik arfinilinnik akiitsoqarput. Agguaqatigiissillugulu pisortanut 22.000 koruuninik akiitsoqarpugut, aningaasaqarnermut ataatsimiititaliap isumaliutersuutaani allassimavoq.

- Innuttaasut akiliisinnaassuseqartut pisortanut akiligassaminnik piaaralutik akiliisannginerminni tillittutut taaneqarsinnaapput, ataatsimiititaliaq allappoq imalu naliliilluni:

- Ajornartorsiut tunngaviatigut aaqqinneqarsinnaanngilaq akileraaruseriffimmi sulisunik amerliliinikkut imaluunniit allaffissornerup allanngortinneratigut. Ajornartorsiut aaqqinneqarsinnaavoq eqqarsartaatsip allanngortinneratigut.

Powered by Labrador CMS