Raajat patajaatsumik amerliartorput

Aalisarnerup siammarneruneranik saarulliillu raajartortut ikilinerannik pitsanngoriartoqarsimavoq kisianni suli raajaqassuseq mianersuuttassaavoq, biologit siunnersuutigaat.

2010-mi raajaqassuseq 2009-misut ippoq.

Pinngortitaleriffimmiit biologit raajaqassutsimik misissuinertik naammasseqqamerpaat. Siunnersuutigineqartoq siornarnit 10.000 tonsinik qaffasinneruvoq, taamaakkaluartorli tamanna pisanik ikilisitsineruvoq, tassami 2010-mi pisat tamakkerlutik 137.000 tonsiunissat ilimagineqarmat. 2011-mi Tunumi raajaqassutsimut siunnersuut 12.400 tonsiuvoq, taammalu siorna siunnersuutitut annertussuseqarluni.

Pissutsit pingasut biologit Naalakkersuisunut ukiumi aggersumi pisassiissutip qaffasinnerulaarnissaannik siunnersuuteqarnerannut aalajangiisuupput:

Misissuinerit nutaat takutippaat kinguppaat mikisut kinguppannut akuliussortut 2008-miit 2010-mut allanngorsimanngimmata. 2009-mi biologit paasissutissat takutimmassuk malunnartumik kinguppaaqqat akuliussortut annikilleriarsimammata isumakululersimagaluarput.

Biologilli massakkut paasissutissat logboginit pisut misissorneqartarnerat pitsanngorsarsimavaat taavalu paasinarsisimavoq aalisarfiit siamasinnerulersimasut annikitsumi siornatigutut eqimaffiujunnaarluni.

Saarulliit (Kitaata avataani) assut ukiuni kingullerni pingasuni annikillisimapput. Biologit kinguppaat nalilersoraangamikkit matematisk modeli kinguppannik saarullit nerisaannik ilanngussisoq atortarpaat. Saarulliit ikikkaangamik kinguppaat nerisaat ikittuinnaasarput, biologillu isumaqarput tamanna kinguppaat 2010-mi 2009-sut amerlatigisimanerannut nassuijaatissaasoq.

”Kinguppaqarnerata aalaakkaanerulerneranik siuariartorneranilluunniit malugisaqanngilagut. Isumakulunnginnerulerpugulli, tassami aalisartut saarulliillu kinguppannik isumalluutinik tatisinerat aarlerigisatsinnit minnerummat. Taamaattumik 2011-mut siunnersut siornarnit 10.000 tonsinik qaffasinneruvoq, kisiannili kinguppaqatigiinnik qanoq naliliinerput allannguuteqanngilaq,” immikkoortortami pisortaq Helle Siegstad oqarpoq.

Powered by Labrador CMS