Ilulissat erngat takkutilerpoq
Ingerlatsivik nutaaq Arctic Ice Cap Water A/S Kalaallit Nunaanni pilersinneqalerpoq. Ilulissat aatsillugit erngat puiaasanut immiuttassavaat.
Ingerlatsiviup nutaap Arctic Ice Cap Water A/S-ip ilulissat aatsillugit ernga atorluarniassavaa, imaani tunisassiorfik atorlugu immikkut ittumik tunisassioriaaseqassalluni. Kilisaat tunisassiorfik Kalaallit Nunaanni allanngortiterneqassaaq, kingornalu ilulisssanik aallertassalluni atsiterisassallunilu. Erngup puiaasanut immiunneqarsimasup piumaneqarnerata annertusiartornera ilutigalugu kilisaatit amerlanerit allanngoirtiterneqarlutik tunisassiornermut ilanngunneqassapput.
Peder Pedersen niulialu Margrethe Dahl tunisassiorfimmik ingerlatsisuussapput, amerlasuunik aningaasaliisoqarlutik, ilaatigut Claus Hammelhoff, Formuepleje A/S-imik pilersitsisoq.
Peder Pedersen, ingerlatsivimmi pisortaasoq, nulialu Margrethe Dahl pitsaassutsimut pisortaasoq mikrobiologi-milu immikkut ilisimasalik, Arctic Ice Cap Water Kalaallit Nunaanni ineriartornermik pilersitseqataassasoq naatsorsutiginnipput.
- Allaffeqarfik, pisortaqarfik tuniniaasarfillu Kalaallit Nunaanni pilersissavagut. Nunarsuaq tamakkerlugu tuniniaasarfik aqqutigalugu tuniniaaneq ingerlanneqassaaq. Poortuineq, toqqorterineq nassiussuinerlu illuutini pioreersuni sananeqaqqammersunilu ingerlanneqassapput, tamannalu Kalaallit Nunaanni ineriartornermut pissutaaqataassaaq, Peder Pedersen oqarpoq.
Namminersorlutik Oqartussanit akuersissuteqarnissaq puiaasanut immiussuinissap aallartinnissaani kisimi amigaataavoq.