Demokraati: Qaqortumi mittarfittaarusuppugut
Qaqortumi Demokratit assartuinermut ataatsimiititaliarsuup Qaqortumi mittarfiliortoqarnissaanik innersuussinera iluarisimaarpaat.
- Ukiuni qulikkaani nunatta kujataani angallanneq eqqartortuarparput. Kiisami iliuuseqartoqarnialerpoq. Ataguli atorluariartigu!
Taama tusagassiuutitigut nalunaarummi Demokraatini ilaasortaq Kommune Kujallermilu kommunalbestyrelsimut ilaasortaq Carl Rødgaard allappoq.
- Mittarfiliortoqarpat uagut kujataamiut aningaasaqarnikkut ineriartortoqarnissaa isumagissavarput, taamaalilluni Qaqortumi mittarfik inuiaqatigiinnut iluaqutaalluni. Kaasimaarunnaarluta nunatta sinneranut takutitsigu nammineersinnaalluta, kommunimi naalakkersuinermik suliaqartoq oqarpoq.
Carl Rødgaardip maluginiarpaa kujataanut ilaasut amerlanersaat Qaqortuliartuusartut. Pissusissamisuussaaq siunissami kujataani Qaqortoq aallaaviuppat. Isumaqanngilarlu Qaqortumi mittarfiliorneq tassani najugaqartuinnarnut iluaqutaassasoq. Isumaqarpoq tamanna kujataamiunut tamanut pitsanngoriaataassasoq. Ullumikkut Nanortalimmiut Qaqortumi Narsarsuarmiluunniit unnuisariaqartarput arlaannut angalaniaraangamik. Qulimiguulinnillu angallassineq tassarpiaavoq ullumikkut killilersuisoq, taamaattumik atorunnaarpata illoqarfinni allani kiffartuussineq pitsaanerulissaaq.
- Demokraatinit pitsaaqqutitut aamma isigaarput kiffartuussineq illoqarfimmi suliassat ilaaniilissappat. Tamanna siuariartitsillunilu toqqaannartumik suliffissanik pilersitsissaaq, aammali susassaqarfinnut allanut kiffartuussinermut håndværkerinullu tuniluutissalluni, Carl Rødgaardip nalilerpaa.
Takornariaqarnermut iluaqutaassanerarpaa kujataani tamarmi sivikinnerusumik angalasalernissaq takusassanillu takuniaalluni. Tamanna takornariaqarnermut tamarmut siuariaataassaaq.
- Piffissami aggersumi nunap immikkoortuani aatsitassarsiulernissat arlallit aallartinneqarnissaat ilimanaateqarpoq. Soorlu Kangerluarsuup qinnguani aatsitassarsiorfeqalersinnaavoq. Taanna siunissami qanittumi periarfissaqarnerussagunarpoq, Carl Rødgaardip nalilerpaa.
Inissisimavia eqqarsaatigalugu Qaqortumi mittarfimmut aqqut Kangerluarsummut aqqusiornissamut aallarniutaassaaq. Taamaalilluni Qaqortumi ineriartortoqassaaq asuli nunatta sinneranisuut kiffartuussiviujunnaarluni.
- Aatsitassarsiornermik suliaqartut illoqarfimmi najugaqarsinnaapput aatsitassarsiorfimmullu biilersinnaallutik. Tamanna illoqarfimmi inuutissarsiornikkut ineriartornermik soorunami pilersitsissaaq immaqalu namminersorlutik illuliorniartunut aningaasaqarnerulersitsissalluni, Carl Rødgaard oqarpoq.
Demokraatit kissaatigaat 1,799 meterimik mittarfiliortoqarnissaa taamaalilluni timmisartut 200-nik ilaasoqartut toqqaannartumik Europaliarsinnaallutik. Carl Rødgaardip upperaa tamanna akilersinnaanerussasoq aatsitassarsiorneq, uuliasiorneq takornariaqarnerlu annertunerusoq eqqarsaatigalugit.
- Kisianni soorunami aamma 1.199 meteri inooqataaffigisinnaavarput. Kisianni pingaartuuvoq mittarfiliorfissap tallisinnaasumiinnissaa. Mittarfiit taamaattut takissuseqartut atorlugit Islandimut Canadamullu timmisartortoqarsinnaavoq, Carl Rødgaard isumaqarpoq.