Skip to main content

Narsarsuup mittarfiit oqaluuserai

Narsarsuarmi timmisartorsuarnut mittarfik Qaqortumilu nunap iluani mittarfik iternga tikillugu oqaluuserineqarput.

Marlunngormat innuttaasunik ataatsimiititsinermi innuttaasut Narsarsuarmiut qanittuaniittullu 50-t takkupput.

Ataatsimiinnermi ilaatigut peqataapput Kommune Kujallermi borgmesteri Simon Simonsen, kommunaldirektør Jørgen Vetterlain kiisalu Jørgen Lund, nunaqarfiup siulersuisuineersoq.

Jørgen Lundip oqaluttuaraa ataatsimiinneq ingerlanneqartoq nunaqarfimmi siulersuisut suliniuteqarnerisigut, taakkualu borgmesteri Narsarsuarmut qaaqqusimavaat siunertaralu Narsarsuup siunissaata oqaluuserinissaa, assartuinermut kommissionip siunissami Kujataani angallannermut atortorissaatit pillugit Narsarsuarmilu mittarfiup matuneqaratarsinnaaneranik nalunaarusiaata kingunerisaanik.

Simon Simonsenip oqaluttuaraa Qaqortumi mittarfittaarnissaq kissaatigineqarpoq, tassa angalasut 80%-ii Narsarsuaq aqqusaarlugu illoqarfimmut tassungartarmata, immikkullu Narsarsuarmit helikopterimik angalaneq, siumut utimullu 1862,-koruunilik, akisuvallaaqimmat.

Simon Simonsenip erseqqissarpaa Narsarsuaq matuneqarusunngitsoq, taarsiulluguli aaqqiissutissamik allamik sulissuteqartoqartoq, sapinngisamik tamanut pitsaanerpaamik. Maannangaaq isumaliutigineqarpoq Issittumi Sakkutooqarfiup Narsarsuarmut inissinnissaa, taamaassappallu Narsarsuaq matuneqassanngilaq. Tamanna ilutigalugu kommunip sulissutiginiarpaa Narsuarsuami inuussutissarsiutinik allanik pilersitsisoqarnissaanerata tapersersornissaa, siunnersuutigineqarporlu suleqatigiissitaliortoqassasoq siunnersuusiorsinnaasumik.

Tamatuma kingorna Kommune Kujalliup aningaasaqarniarnikkut inissisimanera kommunaldirektørip oqaluttuaraa. Ukiumut missingersuutit 423 mio. kr.-iupput ukiullu naanerani 23 mio. kr.-inik sinneqartooruteqartoqassaaq, akissarsianut assigiinngitsunut utoqqalinersianullu il.il. aningaasartuutinut matussutissanik. Aningaasarsiornikkut ajornartorsiornerup kingunerisaanik suliffissaaleqisut amerlisimapput (kommunimi innuttaasunit 7500-nit maanna 5-600-t), tamannalu pissutigalugu kommunip aningaasartuutai annertusisimapput. Tamatuma saniatigut kommuni 2008-mit 2009-millu 33 mio. kr.-inik amigartooruteqareerpoq (akineraarutit namminersorlutik oqartussanut akiliutigineqartut ikippallaarnerat pissutigalugu) kiisalu allanik 51 mio. kr.-inik akiligassaqarluni.

Kommuni nalinginnaasumik aningaasaqarnerluppoq, namminersorlutik oqartussat isumasioqatigalugit ukiuni arlalinni iluarsiniarneqartussamik. Piffissami kingullermi atorfinnik atorunnaarsitsinermigut kommunip 13 mio. kr.-nit sipaarutigisimavai, akiligassarpassuilli naammassiniarnerannut innuttaasut ikiuutissapput. Siusinnerusukkut eqiterinermik oqalunneq paqumanartinneqarsimavoq, aningaasarsiornikkulli pissutsit pissutigalugit tamanna killilimmik akuersaarneqartariaqarpoq.

Narsarsuarmi teknikkimut pisortaq Finn Thomsen oqarpoq Narsarsuarmit akileraarutitigut isertitat annertuujusut, tamakkualu tammassasut mittarfik Qaqortumut nuunneqassappat. Ullumikkut Narsarsuarmi sulisut 140-uupput naatsorsuutigineqarporlu akileraarutitigut tunngaviit ukiumut 14 mio. kr.-nit missaanniittut. Qaqortumi mittarfik qularnanngitsumik ikinnerujussuarnik sulisoqassaaq - immaqa quliinnarnik.

Ukiumut 14 mio. kr.-nit annaaneqassappata kommunimi innuttaasut 2-4 procentinik annertunerusumik akileraartalissapput. Taavalu innuttaasut isumaliutigissavaat billetsit akii appasinnerusut akileraarutit qaffaataannut oqimaaqatigiissitsisinnaanersut.

Simon Simonsen akivoq mittarfiliortoqassappat taanna sivisuumik pilersaarusiorneqarlunilu sananeqassasoq, qularnanngitsumillu piffissami tamatumani kommunimi aatsitassanik piiaaffinnik pilersitsisoqarsimassasoq. Tamakkua suliffissanik amerlanerusunik kinguneqassapput taamaasillunilu annaasanut matussutissiissallutik. Finn Thomsenip ilanngullugu oqaatigaa qanorluunniit pisoqassagaluarpat aatsitassarsiornikkut pissarsisoqassasoq.

Simon Simonsenip ilanngullugu oqaatigaa takorloorluarsinnaallugu siunissami mittarfinnik marlunnik kommunimi ingerlatsisoqalernissaa - Narsarsuarmi Qaqortumilu. Tassa Narsarsuaq matusariaqanngilaq Qaqortumi allamik mittarfiliortoqarnera pissutigalugu.

Tamatuma saniatigut Simon Simonsen naliliivoq piffissaq ungasinnerusoq isigalugu Narsarsuup eqqaani Motzfeldt Sø-p eqqaani aatsitassanik piiaaffeqalersinnaasoq, tamannalu Narsarsuup ammatiinnarnissaanik tunngavilersuutaasinnaasoq, immaqa Issittumi Sakkutooqarfiup Narsarsuarmi pilersinneqarnera ilanngullugu.

Simon Simonsen isumaqarpoq isumalluarnartoqartoq Forsvarskommandop Narsarsuaq sakkutooqarfimmut qullersaqarfittut nutaatut toqqassagaa, Nuummut inissinneqarnissaanut sanilliullugu tassunga inissinneqarnera akikinnerujussuussammat. Narsarsuarmi atortussat tamarmik pigineqareerput.

Tamatumunnga Finn Thomsen oqarpoq qularutiginagu Qaqortumi mittarfiliortoqareersimappat forsvarskommandop Narsarsuaq sakkutooqarfittut toqqarnavianngikkaa. Qularnanngilluinnartumik Narsarsuup matuneqarnissaanik kinguneqassaaq.

Kommunaldirektøri ilanngussivoq oqarluni kommunip assartuinermut ataatsimiititaliaa Assartuinermullu kommissioni Kujataani angallannermut pissutsinut suna pitsaanerpaanersoq nalinginnaasumik isumaqatigiinngissutigigaat, isumaqarlunili kommunimi marlunnik mitttarfeqarnissaanut tunngavissaqassanngitsoq.

Peter Olsson (Narsarsuaq) isumaqarpoq Qaqortumi mittarfimmik sananani mittarfeeqqamik Twin-Otterimik miffigineqarsinnaasumik sanasoqarsinnaasoq. Taanna akikinnerujussuussaaq. Tamannalu allatut aaqqiissutissatut siusinnerusukkut siunnersuutigineqarsimavoq.

Finn Thomsen isumaqarpoq Qaqortumi mittarfiup nutaap kingunerissagaa siunissami Nuuk Kangerlussuarlu aqqusaarlugit Kujataanut angalaneq akisunerulerlunilu ajornakusoornerulissasoq.

Simon Simonsen akivoq angalaneq maanna Kangerlussuakkoortareersoq akisunerulernavianngitsorlu. Simonsenip ilanngullugu oqaatigaa maanna Cimber Sterling isumaqatigiinnarfigineqartoq Aalborgimiit Kangerlussuarmut timmisartuussivimmik toqqaannartumik pilersitsinissamik, aappaagu atuutilersinneqarusuttumik. Taanna iluatsilluassappat Cimber Sterlingip isumaliutiginiarpaa piffissaq ungasinnerusoq eqqarsaatigalugu ukioq naallugu timmisartuussisalernissaq.

Aamma tunngavilersuutigineqarpoq mittarfinnik nutaanik pilersaarusiorani taarsiullugu Air Iceland qaninnerusumik suleqatigineqassasoq Islandilu aqqusaarlugu timmisartuussisarluni. Tamatuma qularnanngitsumik kingunerissavaa billetsit akikinnerusut.

Angallasseriaatsimut ataasiinnarmut taartissatut aamma oqaluuserineqarpoq Kujataani angallatinik aalajangersimasumik ingerlaarfilinnik pilersitseqqinnissaq. Tamanna 1990-ikkunni ingerlalluarsimavoq, inuillu angallatit iluarisimavaat. Simon Simonsen isumaqarpoq angallasseriaaseq ataasiinnaq kukkunerusoq angalaltillu aalajangersimasumik ingerlaarfillit isumassarsiatsialaasinnaasut.

Simon Simonsenip pingaartippaa pissutsit ullumikkut suli qulaajarneqarsimanngitsut, Narsarsuullu siunissaa aatsaat aalajangiiffigineqarsinnaasoq Illersornissamut Ataatsimiittaliaq aalajangereerpat Issittumi Sakkutooqarfik siunissami sumi inissinneqassanersoq. Tamanna pissaaq aappaagu juunimi, tassa ukiup affaata missaa qaangiuppat. Aataat tamatuma kingorna qanoq pisoqassanersoq aalajangiisoqarsinnaavoq.

Simon Simonsenip ilanngullugu oqaatigaa periarfissarpassuaqartoq mattunneqarsinnaanngitsorlu Narsarsuup attatiinnarneqarnissaata toqqarneqarnissaa. Borgmesterilli neriuutiginerpaavaa Issittumi Sakkutooqarfiup Narsarsuarmut inissinneqarnissaa, taavalu aatsitassarsiorfissanit aningaasat iluaqutigalugit kommunimi mittarfiit marluk ingerlanneqarsinnaassasut - Qaqortumi Narsarsuarmilu.

Tamanna kommunalbestyrelsip novembarip 26-ianni ataatsimiinnerani oqaluuseralugu nanginneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER