Sullivinnik Nakkutilliisoqarfik Maniitsuliassaaq

Maniitsumi Brugsenimi toqunartumik ajutoornermut paasissutissiinissamut politiit tunuarsimaarput. Brugseni maanna matuneqarpoq politiit sullivinnillu nakkutilliisoqarfiup qanoq pisoqarsimaneranik misissuineranni.

Brugsen Maniitsumi sulinermi ajutoorneq maanna sullivinnik nakkutilliisoqarfiup poltiiillu misissulerpaat. Ass.: Leiff Josefsen

– Angummik ataatsimik ullumi Maniitsuiartitsissaagut qanoq pisoqarsimaneranik misissuiartortumik. Tamatumalu saniatigut qanoq pisoqassanersoq oqaatigissallugu siusippallaaqaaq, sullivinnik nakkutilliisoqarfiup pisortaa Jesper Labansen Sermitsiaq.AG-mut oqarpoq.

Politiit aamma sulinermi ajutoorneq misissussavaat, tamatumani napparsimasut 39-t ataasinngormat unnukkut Nuummut timmisartuunneqartariaqarlutik.

– Aamma uanga uppernarsarsinnaanngilara eqqunnginnerarsinnaanaguluunniit pisimasumi politiinut nalunaaruteqartoqarnersoq, politimesterip tullia Morten Nielsen Sermitsiaq.AG-mut oqarpoq.

– Suliassani assigiinngitsuni qanoq isumaliuteqarnerluta nalinginnaasumik paasissutissiissutigineq ajorparput, nalunaarutiginnittoqarpallu taassuma tamanna tusagassiorfitsigut paasissanngilaa uagutsinnit toqqaannartumik paasitinneqareertinnani, Morten Nielsen oqarpoq.

Brugsen Maniitsoq maanna matuneqarpoq aatsaallu ammaqqissalluni pisisartunut matut ammarneqarnissaat akuersissutigineqareerpat.

– Aamma Bispebjerg Hospitalimit immikkut ilisimasalimmit oqaaseqartitsisimavugut, taassumalu paasissutissiissutigaa silicone Brugsen Maniitsumi nerisassaataatitsinnut peqqissutsikkut uloriananngitsoq, Kalaallit Nunaanni Brugsenimi pisortaq Olav Thomsen Sermitsiaq.AG-mut oqarpoq.

– Maanna sallersaatillugu qulaajaqqaassavarput sulinermi ajutoornermut atatillugu qanorpiaq pisoqarsimanersoq. Siusippallaaqaarlu oqaatigissallugu tamanna kinguneqassanersoq, misissuinerit ingerlanneqarnernni, Olav Thomsen oqarpoq.

Maniitsumi Brugseni allilerneqaleruttorpoq ataasinngormallu sulinermi ajutoortoqarpoq, tssani stoffimit siliconemut assingusumit toqunartoq Brugsenimi siaruaappoq. Tamatuma kingorna napparsimasut 39-it Nuummut timmisartuuttariaqarput, napparsimasullu siulliit ullup qeqqata missaani angerlartinneqassapput. Napparsimasut perulunnerpaat peruluttut inaaniitinneqarpit. Tamakkuali inuunerminnik ulorianartorsiorsimanngillat.

Nakorsaanerup Folmer Lynggaardip naatsorsuutiginngilaa napparsimasut ataavartumik ajoqusersimassasut.

Powered by Labrador CMS