Qanorooq ulloq allortarlugu

Tusagassiortunik amigaateqarneq pissutigalugu Qanorooq siunissami taamaallaat ataasinngornikkut, pingasunngornikkut tallimanngornikkullu unnukkut aallakaatinneqartalissaaq.

Qanorooq siunissami taamaallaat ataasinngornikkut, pingasunngornikkut tallimanngornikkullu aallakaatinneqartalissaaq. Ass.: KNR

Namminersorlutik Oqartussani suliffeqarfinnilu ataaniittuni atorfinitsitsisarnerup unitsinneqarallarnerata kinguneri KNR-p maanna malugaia.

Qanoruumi atorfiit pingasut inuttaqanngillat, piffissamilu sivisuumi unnukkut nutaarsiassaqartitsisarsimapput aaqqissuisoq, tusagassiortoq ataaseq, freelanceri studiamiittorlu. Aamma nutserisuni atorfiit pingasut inuttaqanngillt, taakkualu Qanorooq qallunaatut allagartarlersortarpaat.

- KNR-imi qullersat aalajangerneq tamanna ajuusaarutigaat, tamannali peqatigalugu oqaatigisariaqarlugu naammattunik sulisussaqanngitsugut ulluinnarni unnuit tamaasa pitsaassusilinnik suliarilluakkanillu nutaarsiassiortarnissamut, KNR tusagassiorfinnut allakkamini allappoq.

Taamaattumik KNR-p qullersai aalajangerput ullumikkuminngaanniit Qanorooq sapaatip akunneranut pingasoriaannarluni aallakaatinneqartassasoq, aaqqissuussinerlu taanna ingerlassasoq tusagassiortut nutserisullu naammattut atorfinitsinneqarnissaasa tungaanut.

Powered by Labrador CMS