Meeqqat atuarfiat pitsaanngilaq

2009-mi naggataarutaasumik soraarummeernerit ilinniaqqinissamut tunngavissatut naammanngitsut takuneqarsinnaavoq.

Aningaasaqarnermut siunnersuisoqatigiit nalunaarusiaminni siullermi ilinniartitaaneq sammivaat. Siunnersuisoqatigiit meeqqat atuarfianni angusat misissoqqissaarsimavaat, aammalu ukiut marluk misissorsimallugit, paasiniarlugu ilinniartitaanerminni sumut killissimanersut.

– 2009-mi naggataarutaasumik soraarummeernerit takutippaat, meeqqat atuarfianni atuartut ilarpassuisa angusaat ilinniaqqinnissamut tunngavigissallugit naammanngitsut. Oqaatsitigut piginnaasat amigaataapput, Aningaasaqarnermut Siunnersuisoqatigiinni siulittaasoq ilisimatooq Søren Bo Nielsen pingasunngormat Nuummi nalunaarusiartik siulleq saqqummiukkamiuk oqarpoq.

Erseqqissarpaa taamatut inissisimasoqarnera nukissaaleqinermik peqquteqanngitsoq. Meeqqat atuarfiani atugassarititaasut ajunngillat. Ilinniartitsisoqarneq ajunngilaq. Taamaattumik atuartut angusarissaarpallaannginnerat allanik peqquteqarsimassaaq.

Naammattumik tunngavissaqannginnermut Søren Bo Neilsenip assersuutigaa, tuluttut allattariarsornermi atuartut 30 procentii 5-imik angusaqarput taannaluunniit ataallugu. Kalaallisulli allattariarsornermi atuartut 88 procentii 6-mik angusipput taannaluunniit qulaallugu, 69 procentillu qallunaatut allattariarsornermi 6-imik taannaluunniit qulaallugu angusisimasut.

Misissuinerup aappaata takutippaa, 1971-miit 1976-mut inunngorsimasunit 2006-mi qassit piginnaalersitsisussamik ilinniagaqarsimanersut. 2006-mi taakku 30-niit 35-inut ukioqarput, sunngorsimanersullu takuneqarsinnaavoq.

– Takuneqarsinnaavoq affai ataallugit piginnaalersitsisumik ilinniarsimasut, Søren Bo Nielsen oqarpoq. Apeqqutaavoq illoqarfimmiuuneq imaluunniit nunaqarfimmiuuneq. Illoqarfimmiut 50 procentii piginnaalersitsisumik ilinniarsimapput, nunaqarfimiulli 30 procentii piginnaalersitsisumik ilinniarsimallutik, oqaatigaa.

Søren Bo Nielsenip maluginiarpaa nunaqarfinniit kisitsisit assigiinngimmata. Allanngorarput, piginnaalersitsisumik ilinniarnermi apeqqutaalluni nunaqarfik suna pineqarnersoq. Nunaqarfiit ilaanni 50 procenti qulaanneqarsimavoq, oqarpoq.

Misissuinerup aamma takutippaa piginnaalersitsisumik ilinniarneq iluaqutissartalerujussuusoq.

– Piginnaalersitsisumik ilinniarsimasut isertitamikkut annertuumik siuneriarsimapput. taamaattumik ilinniaqqinnissaq tunngavissaqarluarpoq, nangippoq.

Aammali tassani illoqarfimmiuuneq imaluunniit nunaqarfimmiuuneq apeqqutaavoq. Nunaqarfimmiu illoqarfimmiorlu assigiimmik ilinniarsimasut assersuukkaanni, illoqarfimmiu nunaqarfimmiumiit pissarsinerusarpoq.

– Naak assigiimmik ilinniarsimasuugaluartoq isertitatigut assigiinngitsumik inissisimasoqarpoq. Ilinniakkat ilaanni illoqarfimmiut nunaqarfimmiuniit 20 procentimik qaffasinnerusumik isertitaqartarput, ilinniakkanilu allani 10 procentimik nikingasarlutik.

Aningaasaqarnermut siunnersuisoqatigiit innersuussutigaat una misissuisimaneq allanik nutaanik misissuinernik malitseqassasoq, taamaalilluni ukiut marlussuit qaangiuppata 1981-miit 1986-imut inunngorsimasut siuariarsimanersut takuneqarsinnaassalluni.

– 1981-miit 1986-imut inunngorsimasunik misissuigallarnerup takutippaa, 2006-mi piginnaalersitsisumik ilinniagaqarnermut atatillugu siuariartoqarsimanngitsoq. Tamannali oqaatigissallugu siusippallaalaarpoq, 20-nik 25-inullu ukiulippassuit suli ilinniakkaminnik naammassinnissimanngimmata. 2016-mi kisitsisit takoqqittariaqarpavut 1981-miit 1986-imut inunngorsimasut 1971-miit 1976-imut inunngorsimasunut assersuussinnaassagaanni takullugu piginnaalersitsisumik ilinniarnissaq soqutigineqarnerulersimanersoq, Søren Bo Nielsen oqarpoq.

Powered by Labrador CMS