Svenskeq ilisimatooq: Nunat Avannarliit kattullik
Nunat avannarliit ataatsimut 25 millioninik inoqassapput nunarsuarmilu aningaasarsiornikkut pissaaneqarnerpaat qulerissallugu. Atuakkami nutaami svenskip oqaluttuarisaanermik ilisimatuup nunat avannarliit naalagaaffeqatigiissasut siunnersuutigaa.
Dronning Margrethe nunat avannarliit naalagaaffeqatigiit qullersarissavaat. Taamatut allappoq svenskeq oqaluttuarisaanermik ilisimatooq Gunnar Wetterberg atuakkasmi nutaami, ullumi saqqummersumi ateqartumi Forbundsstaten Norden.
Tassami nunat avannarliit immikkoorlutik tamarmik naalagaaffeeraapput susinnaarpianngitsut nunat tamalaat katersorsimasuini sunniuteqarpiarsinnaanngitsut. Taamaallaat nunap assingani titarneeqqanik avissaarsimasut.
25 millioninik inoqarluni nunarsuarmilu anignaasarsiornikkut pissaaneqarnerpaat qulingattut nunat avannarllit naalagaaffeqatigiit nutaaliaasut ataqqineqalissagaluarput, svenskeq atuakkiortoq tunngavilersuivoq.
Islandip illoqarfiisa pingaarnersaanni Reykjavikimi Nordisk Rådip ataatsimiinnerani Gunnar Wetterbergip nunat avannarliit naalagaaffeqatigiiffissuannik nukittuumik isummani ullumi saqqummiutissavai.
Gunnar Wetterberg malillugu silatusaarnerinnaavoq naalagaaffeqatigiit assilinerat, tamakkua eqqunneqarsimallutik Tuluit Nunaanni Frankrigimilu ukiuni akulleni siusissukkut, spaniami 1400-ukkunni aammalu Tysklandimi Italiamilu 1800-ukkunni. Nordisk Ministerrådip misissuinerata takutippaa nunat avannarlerni innuttaasunik annertunerusumik suleqatigiilernissaq tapersersoraat, tamannali peqatigalugu ersissutigalugu nunat avannarliit qaninnerusumik suleqatigiilissappata qanimut oqartussaaqataanerup kinaassutsillu annaanissaat.
Taanna isumaqarpoq Nunat Avannarliit kattussimasut EU-mi siuttuusinnaasut, aammalu Nunat Avannarliit G20-imi FN-imilu ataavartumik ineqartariaqartut. Taamatut allapput MetroXpress aamma Ritzau.
Forbundsstaten Nordenimut paasissutissat svenskillu Forbundsstaten Nordenimik takorluugai:
* Angissusia: 3,43 millioner kvadratkilometer. (Nunarsuarmi naalagaaffiit annersaasa arfineq-aappassaat).
* Innuttaasut: 25,5 millionit.
* Kvadratkilometerimut innuttaasut: 16
* Inuunerup takissusiatut naatsorsuutigisat: Angutit ukiut 78, arnat ukiut 83.
* Naalagaaffiup qullersaa: Dronning Margrethe II. (Nunani avannarlerni kunngini sivisunerpaamik atasimasoq).
* Erfalasoq: Sanningasoq aappalaartoq tunuliaqutaa sungaartoq.
* Inuiattut erinarsuut: Du gamla, du fria, du fjällhöga nord.
* Illoqarfiit pingaarnersaat: Kalmar (62.363-inik inulik).
* Illoqarfiit anginersaaty: Stockholm (innuttaasut 827.498), København (innuttaasut 678.873), Oslo (Innuttaasut 586.860), Helsingfors (innuttaasut 583.350).
* Qaqqat portunersaat: Gunnbjørn fjeld (3693 meterit) Kalaallit Nunaanni.
* Tatsit annersaat: Vänern (5648 kvadratkilometerit).
* Kuussuit takinersaat: Trysilelva/Klarälven/Göta älv (756 kilometerit).
* Qeqertat annersaat: Kalaallit Nunaat (2,1 millioner kvadratkilometerit).
* Aningaasaq: 1 nordisk krone = 100 øre.
* Naalagaaffimmi tunisat ataatsimut nalingat: Amerikarmiut dollarii 968 milliardit (6000 milliarder koruunit missaanni).