Brugsen 100.000 kroninik ukiumoortumik nersornaasiisalissaaq
Kalaallit Nunaanni Brugsenit ukiumoortumik nersornaasiisalissapput 100.000 kroninik aningaasartaqartumik. Nersornaat januaarimi siullermeertumik tunniunneqassaaq.
Nersornaasiisarneq pisassaaq ukiumoortumik agguarnersiat tunniunneqarneranni, KNB nalunaarpoq.
Ukiumoortumik nersornaat suliniaqatigiiffimmut, peqatigiiffimmut imaluunniit inummut arlaanik suliniuteqartumut tunniunneqartassaaq.
Nersornaat tunniunneqarsinnaavoq soorlu isumaginninnikkut suliniummut, inoqatinut suliniutinut, timersornermi allatulluunnit nammineq piumassutsimik sulisunut; inuutissarsiortunut, isumassarsiamut, inummut ataatsimut maligassiuisumut imaluunniit inummut inuunermini sivisuumik suliniuteqarsimasumut tunniunneqarsinnaassaaq.
KNB-mi siulittaasoq Ole Mølgaard-Motzfeldt innuttaasunik kajumissarivoq siunnersuusioqqullugit kina, suliniut suna suliniaqatigiiffilluunniit sorleq Brugsenip nersornaasiuttagaanik tunineqassanersoq.
- Brugsenit nuna tamakkerlugu siulersuisuisa taamatut nersornaasiisarnissaq pilersippaat suliniutinut inuit ulluinnarni inuuneranni pingaaruteqartunik siuarsaanermi akisussaaqataaneq peqqutigalugu, KNB-mi siulittaasoq oqarpoq.
Brugsenit KNB-llu ukiumut siunertanut assigiinngitsunut 1,2 million kronit atortarpaat.
Aningaasanut illoqarfinni Brugseneqarfinni suliniutinut atorneqassapput. KNB aamma nuna tamakkerlugu suliniutinut aningaasaliisarpoq. Aningaasat qinnuteqarnikkut tunniunneqarsinnaapput.