Pujoq radiukkut
Init pujortarfiunngitsut pillugit paasisitsiniaanerit aallartipput.
Pujortarunnaarnissamut siunnersuutit pujortarunnaarnissamullu katsorsartinnerit tassaapput ataasinngorpat unnukkut avatangiisit pujortarfiungnitsut pillugit paasisitsiniaanermi ilaatigut sammineqartussat.
– Radiukkut tusarnaartartut radiukkut tallimarialutik pikkorissartinneqarnermikkut pujortarunnaarnissamut paasitinneqarlutillu ikiorneqassapput. Assersuutigalugu tusarnaartartut pujortariaatsit pillugit tusartinneqassapput, nikotinip sunniuttarnera pillugu nikotinillu taartissaanik paasitinneqassapput, qanorlu pujortarunnaarnerup kingorna oqimaassuseq aqunneqarsinnaanersoq, peqqinnissamut pinaveersaartitsinermullu aqutsisoqarfimmit nalunaaruteqartoqarpoq.
Radiukkut aallakaatitassat oqallinnermik pilersitsisussat 15-it suliarineqarsimapput, pujortartarnerup kingunerisaanik imaqartut kiisalu radiukkut pujortarunnaarnissamik pikkorissarnerit arfinillit, Isbo Media KNR-ilu suleqatigiillutik suliarineqarsimasut.
– Radiukkut paasisitsiniaanerup siunertaraa peqqissutsip avatangiisillu samminissaa, aammali pujortartarnerup peqqissutsimut avatangiisinullu kingunerisartagai samineqassallutik, aamma siunnersuisoqartassaaq inuit ataasiakkaat pujortarunnaarnissaminnut qanoq iliorsinnaanersut, peqqinnissamut pinaveersaartitsinermullu aqutsisoqarfimmit nalunaaruteqartoqarpoq.