Pinngortitami igalaaminikut 53 kilo katersorneqarput

Nuummi innuttaasut arfineq pingasut qaqqami igaalaaminikunik eqqakkanillu allanik katersisimapput.

- Nuummi qaqqami angalaartilluni sumi tamani igalaaminikoqarpoq inunnut uumasunulu akornutaasunik. Siunertaraarput illoqarfimmi aliannaarsaartarfit nuannernerulersinniarlutigik, angalaartarsimasut asuli eqqagaasa ajoqutaannginnerunissaat anguniarlugu, suliniuteqartoq Peter Kjeldmann tusagassiuutitigut nalunaarummi allappoq.

Inuit arfineq pingasut ingammik ilagaaminikunik katersisarput, aammali sigaritsit kimmivikuinik eqqakkanillu allanik, katersoriarlugit ikuallaavimmut tunniuttarlugit.

-53 kilot tassaapput minnerpaamik immiaqqaat puukui 225-it. Utertissagaanni 450 kronit missani naleqassapput, Peter Kjeldmann allappoq.

- Suli illoqarfiup eqqaani qaqqani igalaaminikorpassuaqarpoq eqqagaqarlunilu. Arsaattarfittut angitigisumiinnaq igalaaminikut katersorsimavagut. Siunertaavoq aappaagu aput aappat akutsunngitsumik igalaaminikut allallu eqqakkat puussiarsualerluta aaqqaserlutalu katersortarniarlugit. Immaqa peqatigiiffinnguamik pilersitsinnaavugut, Peter Kjeldmann oqaluttuarpoq, nassuiaavorlu igalaaminikoq ukiut milliuunit sinnerlugit sivisutigisumik arroriartortartoq.

Powered by Labrador CMS