Saqqummersitsinermi killeqarfiit paaserusunneqarput
Eqqumiitsuliortoqatigiit kalaallit eqqamiitsuliaat kinaassusaallu sammivaat, ilimagineqarsinnaasunik paasinnittaasitoqaq aallaavigalugu.
Kalaallit Nunaanni Kalaallillu Nunaanniit eqqumiitsuliorneq eqqartorneqartillugu suut killigititaanersunut tunngatillugu aperisoqartuaannangajappoq. Kalaallit Nunaanni eqqumiitsuliat ilumut eqqumiitsuliaappat? Kalaallit Nunaanni eqqumiitsuliat tamarigut nunatsinneersunik imaqassappat, tamannalu suugami? Taamaallaat tassaava kalaallit eqqumiitsuliaat? Kalaalerlu eqqumiitsuliortoq suugami? Qanorlu ilisukkut eqqumiitsuliortutut taaneqarsinnaasarpa?
Københavnimi BKS Gragemi aqagu ammarneqartussami Julie Edel Hardenbergip Iben Mondrupillu marluullutik saqqummersitaani Kuummi tassaapput apeqqutit ilaat. Sermitsiaq.AG pingasunngormat ualikkut saqqummersitassanut takuniaammat eqqumiitsuliortut ulapeqaat, inip qanoq iluseqarnissaa aaqqissuullugu, tassaaniertussaavorlu takuniaasup angalanera, eqqumiitsulianik, taallanik atuarnermik,vidionik assilisanik, tipimik, allasserisanik, kalaallit naatsiivianik, tuttup tumaanik alutornartuni allarpassuarnillu takorluuinerup silarsuaaneersunik imaqarluni.
- Ataatsimoorullugu saqqummersitsinermi Kuummi kissaatigineqarpoq kalaallit qanoq eqqumiitsuliortussaanerannik paasinninnermut killigititaasartunik allanngortitsinissaq, takutinneqartut eqqumiitsuliortuni 14-init suliarineqartut aqqutigalugit (tassaasut performerit, teoretikerit, filmiliortartut, nipilersortartut, (isiginnaartitsisartut, atuagarsortut, filmiliortut, nipilersortartut, taalliortut ullutsinnilu eqqumiitsuliortut), taakkulu tamarmik Kalaallit Nunaannut qanittumiittuupput, taama suliniuteqartut ilaat oqaluttuarpoq.
Iben Mondrup aamma Julie Edel Hardenberg eqqumiitsuliortuupput, kalaaliusutullu tunuliaqutaat suliaannut pingaartupilussuuvoq.
- Aamma nunatsinni pisunut akuusupilussuuvugut, assigiinngitsumik sunniiniartarluta; Iben isornartorsiuilluni allattarnermigut, Julielu qasusuilluni siumullu isigaluni kinaassuseq kulturilu pillugit oqallitsitsisarluni, minnerunngitsumik oqaatsivut pillugit.
- Soorunami saqqummersitsinermi sulivut ilaapput, suliniummilu eqqumiitsuliortut qulit kikkut allat toqqarneqarnissaannut piumasaqaatigisimavarput tamarmik ataasiakkaarlutik namminneq nunatsinni pisunik peqataanissaat peqataasimallutilluunniit.
Suliniuteqartut taakkumarluk saniatigut saqqummersitsinermi makku ilaapput: Kelly Berthelsen, Ivalo Frank, Isle Hessner, Bolatta Silis Høegh, Inuk Silis Høegh, Jessie Kleeman, Kuratorisk Aktion, Mikisoq H. Lynge, Angu Motzfeldt, Nanna Ánike Nikolajsen aamma Lars Skinnebach.