Greenpeacep politiit appisaluuppai

Greenpeace Nordenimi allattaanerup Mads Flarup Christensenip politiit isornartorsiorpai tusagassiuutitigut nersoqqusaarnerarlugit.

Greenpeace isumaqarpoq Carin Energymut iliuusertik iluatsittoq. Politiilli tusagassiuutinit nersorneqarnissaminnik ujartuinerarlugit. Assi: Greenpeace.

- Qallortut qaniniarnerisuut aaniarniaraluarpavut, tassalu gummibådit atorlugit. Politiilli tiguaanissamik periarfissartik takusinnaavaat, akunenrillu sisamat atorpaat, qallortut qilleriviup qaanut qaqitinniarsagalugit. Maannakkut taakku sisamat politiinit tigummineqarput, inatsisaatsuliorlutik qallorsimanerat peqqutigalugu, aammali politiit annaassisimallutik tusagassiuutitigut saqqummernissartik anguniarsimallugu.

Taama allappoq Greenpeace Nordenimi allattaanerq Mads Flarup Christensen illersuiniaqatigiit Danmarkimi nittartagaani, akerliuniat sisamat ulluni marlunni Cairnip Kalaallit Nunaata eqqaani qillerinerannik unitsitsimasut politiinit tigusaareersullu. Christensen naapertorlugu tigusarinninneq pivoq Greenpeacep umiarsuaani Esperanzami suleqatini Kalaallit Nunaanni sakkutooqarfimmut politiinullu sianereersullu oqarlutik nammineerlutik qallorsimasut taakku sisamat qaqinerattuulli aaniarlugit. Allataanerulli oqaatiginngilaa tigusaanissaannik akornusersuiniarniarlutik pitsaaliorlugulu, qillerivimmi Stena Donimi nunat tamalaat imartaaniippoq. Taamaakkaluartoq Mads Flarup Christensenip politiit kigaappallaarnerarlugillu tusagassiuutitigut nersualaarneqarnissaminnik siunertaqarsimanerarpai.

Taamaattoq Greenpeacep akerliuniarluni iliuuserisat naammagisimaarpai.

- Iliuuserisaq torrassuuvoq, qillerinissammi annertuumik kukkunerupput ingerlanneqartariaqararatik, Qilelrinerimmi pipput iluliarsuit aqqusaartarsianni, sumiiffinni allani pisoqarfiunngitsunut naleqqiullugit ajutoortoqarnissaanik ulorianaateqarluartuni, maqisoortoqassagaluarpallu saliliinissamut ajornarluinnartumi. Maqisoortoqarnissaa ernummatigaara, uuliasiorfissuillu ernummatigaakka Cairnip qillerineranik amlinnaaqqissaartut. Cairn uuliamik nassaassappat, nunarsuarmi tamarmik uuliasiorfissuit qalaallit nunaata kitaani imartami sumi tamani ujaasilissapput, Mads Flarup Christensen allappoq.

Akerliuniat sisamat maannakkut Aasianni politiinit tigummineqarput, isumannaallisaanermut killigititaasumik qaangiisimanertik inatsisaatsuliorlutillu qilleriviliarsimanertik pillugu unenrluutigineqassallutik. Suli amerlanerusut tigusarineqariaannaapput. Tassani pineqarput pingasut allat qallortunik ikiuisut. Taakkuli Esperanzamiipput, suli nunat tamalaat imartaaniillutik.

Greenpeacep politiinik pasilliineranut oqaaseqartitsisoqarsinnaasimanngilaq.

Powered by Labrador CMS