Atuarfiup matunissaa 300-t akerliuffigaat
Angajoqqaat, ilinniartitsisut atuartullu Nuummi borgmesteri Asii Chemnitz-Narup Atuarfiup Qorsussuup matunnginnissaanik kimigiiseraluarput.
Marlunngormat akerliussutsimik takutitsisut atuarfimmiit illoqarfikkut ingerlaarput rådhusip tungaanut Atuarfiullu Qorsussuup matunissaanut akerliullutik atsiornerit borgmesterimut tunniullugit.
Innuttaasut atuarfiup ataannarnissaa kissaatigaat, ernummatigigamikku atuartut illoqarfimmi atuarfinnut allanut anginernut nuunneqarunik kinguneriumaagassai.
Borgmesterip oqalugiarnermini nalunaarutigaa Qorsussuup atuarfia siunissaa pillugu kommunalbestyrelsemi isumaqatigiinniaqatigiit ataatsimeeqattaarsimasut, taakkulu aalajangiiniarnerminni ajornartorsiortut. Alloriarnerup tullerissavaa misissuinissaq taamaalilluni kommunalbestyrelse naggataarutaasumik aalajangiinissaminut ilisimasaqarluni.
Naggataagut borgmesterip akerliussutsimik takutitsisut nalunaarfigai Qorsussuup siunissaa pillugu kommunalbestyrelsi naggataarutaasumik isummissasoq, novembarip 30-ani 2011-mut missingersuutit akuerineqarpata.