74-it Ilulissani ataatsimeeqatigiipput

Sinerissap avataani uuliasiorneq periarfissarpassuaqarpoq, aammali nalunartoqaqaluni.

Kalaallit Nunaata sineriaata avataani uuliasiorneq pillugu sapaatip akunnerata naanerani uani Ilulissani ataatsimersuartoqarmat ilassiuuttoqarlunilu, ilisarnaatinik paarlaassuisoqarlunilu paasissutissarpassuarnik misilittakkanillu tunniussuisoqarpoq, skotlandimiut uuliasiorfiutaata Cairnip Qeqertarsuup avannaani Sigguk-blokkenimi uuliamik ujaasilluni qilleriffini susassaqanngitsunit ikkivigineqarsimagaluartoq aallarteqqikkaalu.

Ataatsimiinnerit taamaattut aaqqissuisunit »Speed dating«-imik taaneqartarput, tamakkunanilu peqataasut avataani ingerlataqartut naapeqattaarlutik oqaloqatigiittaqattaartarput. Minutsit 12-ikkuutaarlugit suliffeqarfinnik suleqatigisinnasassarsiorlutik. Ualimmallu 74-riarluni ataatsimiittoqareersimavoq.

Skotlandimiut pigisaata sinniisai, Tor B. Lund aamma Kuno Fencker ornigarneqarluarput, ilaatigut aggertoralugit Allan Frost aamma Palle U. Pallesen Arctic Importimeersut.

– Naasussamik ikkussivugut, naassanersoq takussavarput, Arctic Importimeersut oqarput - taanna suliffeqarfiuvoq 1978-imili Kalaallit Nunaanni nioqqutissanik sullissinernillu pilersuilersimasoq.

– Junimi suliffeqarfik Ironbanks Tunup avannaarsuani Citronen Fjordimi sulisoq pilersorparput massakkullu sinerissap avataani sulisunik aatsitassarsiorfinnillu sullitassarsiorpugut, Allan Frostikkut Palle U. Pallesenilu ataatsimeersuarnermut peqataanertik nassuiarlugu sermersitsiaq.ag-mut oqarput.

Tor B. Lundikkut Kuno Fenckerillu aggertorpassuit, Cairnimik sullisserusuttut tusarnaaqqissaarpaat, Kalaallit Nunaannili uuliasiortoqalersinnaanera sorsuakkiarinaveersaarpaat - aatsaammi misissuisoqalermat, tassanilu Cairnip aasarmannaannaq 3 milliarder kronit atorsimavai, aningaasalli amerlanersaat Kalaallit Nunaata avataani atorsimallugit.

– Uuliasioqatigiiffiit 1983-imi Barenthavimi qillerilerput, 1990-imilu misissuinikkut paasineqarpoq, aningaasartuutit 2 procentiinnaat sumiiffimmi suliffeqarfinnut atorneqarsimasut, Tor B. Lund sermitsiaq.ag-mut oqaluttuarpoq.

2 procentit annikiginarsinnaapput, 3 milliartilli 2 procentii sumiffimmi aamma aningaasaapput, Tor B. Lundillu kalaallit suliffiutaat peqataaqqullugit kajumissaarpai: – Silarsuarmi tamarmi uuliasoqatigiiffiit annertuumik sullissisussarsiortarput, tamakkuli suliffeqarfiit ilaannaasa kisimiillutik naammassisinnaasarpaat, taamaattumik suleqatissarsiortarneq iluaqutaasarpoq.

Powered by Labrador CMS