Air Greenlandip FN Global Compact atsiorpaa

Air Greenlandip pisortaanerata Michael Binzerip ullumi sisamanngornermi suliffeqarfiup siulersuisuisa ataatsimiinneranni Ilulissat eqqaanni Eqimi ingerlanneqartumi, FN Global Compactia atsiorpaa.

Air Greenland taamaasilluni nunatsinni suliffeqarfinnit siullersaalluni FN-ip Global Compactip tunngaviinik quliusunik atsiuivoq. Atsiuineq Air Greenlandip Corporate Social Responsibilitymik (CSR) (Suliffeqarfittut inuiaqatigiinni akisussaaqataaneq) suliaqarnerani angusaavoq pingaarutilik, Air Greenlandillu inuiaqatigiinni sullissinermut siunertaqartumik akisussaaqataajumaneranik ersersitsilluni.

- FN-ip Global Compactianik atsiugaqarnitsigut CSR-mik suliaqarnitsinnik ilungersuuteqarnerput avatangiisitsinnut nalunaarutigaarput. Atsiornitsigullu aamma uagutsinnut attuumassuteqartunut takutipparput, tassa sulisutsinnut, atuisutsinnut, suleqatigisartakkatsinnut, Oqartussanut aammalu inuiaqatigiinnut, sulinitsinni CSR annertuumik pingaaruteqartoq, Michael Binzer oqarpoq.

FN-ip Global Compactia nunarsuarmi CSR-mik suliniutit ilisimaneqarnersaralugulu siammarsimanersaraat, taamaattumillu Air Greenlandimut taanna tunngavigissallu isumatusaarneruvoq. Nunani tamalaani ilisimaneqarpoq, suleqatigisartakkanullu attaveqarnerni atussallugu pisariakitsuulluni aamma uuliasiornerit aatsitassanillu piiaanerit eqqarsaatigalugit. Taamaasilluni CSR-ip tungaatigut ”oqaatsit” assigiit peqataasut tamarmik ilisimasaat atorneqassapput. FN-ip Global Compactianik atsiorneq suliffeqarfiup iluani CSR-mik pingaartitsinerulernermik sulisullu akornanni taassuma tungaatigut suleqataanissamut piumassuseqarnerup ersarinneruleranik nassataqassaaq.

Air Greenlandip CSR-p tungaatigut suliniutissatut pilersaarutaata aammalu CSR-mut politikkissaata saqqummiunneqarnerinut, tunngavinnik qulinik aamma imaqartunut, atatillugu Global Compact-ip atsiorneqarnera pilersaarusiugaavoq. Taamaasilluni tunngaviit qulit Air Greenlandip CSR-mut suliniutaani ilaareerput suliffeqarfiullu niuernikkut anguniagaanut nalinginnaasumik akuussallutik. Qaammatit kingulliit aqqaneq marluk ingerlanerini Air Greenlandip suliffeqarfimmi CSR-mik suliniutit ilusilersorlugillu aaqqissuuppai, ilaatigut misissueqqissaarnerit apersuinerillu tunngavigalugit.

Atsiuineq Air Greenlandi suliffeqarfissuartut tamakkerlugu atuuppoq, tassa Hotel Arctic aamma Grønlands Rejsebureau ilaapput.

FN-ip Global Compact-ianut paasissutissat piviusut

FN-ip Global Compactia ukioq 2000 taamani FN-imi generalsekretæriusumit Kofi Annan-imit pilersinneqarpoq. Angerfigeqatigiinneq pilersippaa, FN-ip aammalu nunarsuarmi tamarmi inuussutissarsiornermut pisortat, naleqartitat tunngaviillu ataatsimoorussat aallaavigalugit, nunarsuarmioqataasuni aningaasaqarnermik pingaartitsisut inuppalaartumik kiinnernissaannik tunngavilimmik isumaqatigiissusiornissaat siunnersuutigigamiuk. FN-ip Global Compactia ukiut qulit matuma siorna pilersinneqarnerminiit ingerlalluarsimavoq ullumikkullu CSR-mik suliniuteqartuni ilisimaneqarnerpaallunilu atorneqarnerpaavoq. Ullumikkut nunanit 130-nit suliffeqarfiit 6000-ngajaat FN-ip Global Compact-ianik atsiuereerput.

FN-ip Global Compactia tunngavinnik qulinik uku pingaarutillit aallaavigalugit, inuttut pisinnaatitaaffiit, sulisutut pisinnaatitaaffii, avatangiisit aammalu ileqqorlunnissamik akiuiniarneq. Tunngaviit qulit FN-imi isumaqatigiissutaasut assigiinngitsut tunngavigalugit pilersitaapput – taakkununnga ilaallutik Riomi Isumaqatigiissut aamma Inuttut pisinnaatitaaffeqarnermik nalunaarut – taamaattumillu nunarsuarmut tamarmut tunngassuteqareerlutik.

Suliffeqarfittut tunngaviit taakku atsioraanni malittarinissaannut pissusilersuutigisallu pitsanngorsartuarnissaannut suliniuteqartuarnissamik pisussaaffiliisarpoq. Atsiussagaannili imaanngilaq tunngaviit qulit tamaasa eqqortinnissaat pisariaqartoq, kisiannili anguniarnissaat sulissutigineqassalluni. Suliffeqarfillu ukiut tamaasa tunngaviit qulit toqqammavigalugit CSR-mik suliniuteqarnerminik pinngitsoorani nalunaaruteqartarnissamut pisussaaffeqarpoq.