Kalaallit ´aallartitat´ pillugit oqallinnissaq

Qulequtsiullugu ´Pitsaanerusumik pissaqanngimmat´ Københavnimi Kalaallit Illuutaat unnummik oqalliffimmik ingerlatsiniarpoq, tassani peqataassallutik socialrådgiveri atuakkiortorlu Tine Bryld, eqqartuussissuserisoq Thorkild Høyer siusinnerusukkullu Herstedvesterimi parnaarussaaqqasimasoq Ole Møller.

Tibne Bryldip, Herstedvesterimi parnaarussaaqqasimasup Ole Møllerip aamma eqqartuussissuserisup Thorkild Høyerip kalaallit ilaatigut Herstedvesterimi parnaarussaaqqasimasut pillugit oqallinneq aallartissavaat. Ass.: Sermitsiaq

Unnuk oqalliffik, Københavnimi Kalaallit Illuutaata septembarip 22-ianni nal. 19.00 ingerlatassaa, qulequtarpassuaqarsinnaagaluarpoq, illu allappoq.

Ilaat tassaasinnaavoq: 1960-ikkunni Kalaallit Nunaanni naleqqutinngitsut sumut pippat, tassa saqqummiussisussat sammisassaat tassaammata meeqqat qitornavissiartaassatut Danmarkimut nassiunneqartut, tarnikkut timikkullu innarluutillit Danmarkimi paaqqinnittarfinnut nassiunneqartarsimasut aammalu pinerluttut Nykøbing S.-imi Herstevesterimilu parnaarussivinnut nassiunneqartartut.

Oqallititsisuussapput socialrådgiveri atuakkiortorlu Tine Bryld, eqqartuussissuserisoq Thorkild Høyer aamma Ole Møller, Herstedvesterimi parnaarussaaqqasimasoq.

Unnummi oqalliffimmi ilaatigut tikinneqassapput parnaarussivimmiinneq assersuutigalugu parnaarussamut ilaqutaanullu aliasunnikkut, maqaasinikkut, ilisimannginnginnikkut minnerunngitsumillu kanngusunnikkut qanoq kinguneqarsimava? Qanormi kinaassutsimik misigisimaneq? Sammisassat maanna taakkartorneqartuupput, ilaatigut filmi Eksperimentet tunngavigalugu Kalaallit Nunaanni Danmarkimilu oqallitsitsisoq, ilaatigullu atugassiap Social Kritik normua kingulleq tunngavigalugu, tassani ajornartorsiutit tamakkorpiaat sammineqarmata.

Powered by Labrador CMS