Nuuk Issittumi qaamanersaarusuppoq
Nuuk issittumi illoqarfiit pingaarnersaanni qanoq qaammarsagaalluarnerpaalersinnaava? Illussanik titartaasartut tusaamasaanerit ilaata qaammaqqusersuinikkut qaamarnullu sunniutaanik immikkut ilisimasallip James Carterip siunnersuusiorniarpaa.
Ataatsimiititsinermi qinikkat, atorfillit suliffeqarfiit allallu saammisamut attuumassutillit peqataaffigisassaanni tamanna akiniarpaa, Kommuneqarfik Sermersooq allappoq.
Tamatuma saniatigut Bornholms Kunstmuseumip pisortaa aamma ilisimatooq Stanford University Open Source Centerimi pisortaatigisoq eqqumiitsulianik 3D-nngortitanut katersugaasivimmik Kalaallit Nunaanni pilersitsisinnaanermut takorluukkaminnik saqqummiissapput.
Ataatsimiisitsinissaq Kommuneqarfik Sermersuup aammalu Eskimo Managementip pilersaa-rusioqatigiillutik aaqqissugaat ataasinngornermi septembarip 20-anni nal. 10.00-12.00 Hotel Hans Egedip ataatsimiittarfiani pissaaq.
James Carpenterip siunnersuuteqarluni saqqummiutissavaa Nuuk issittumi illoqarfiit pingaarnersaattut qanoq qaammarsagaalluarnerpaasinnaanersoq. Pilersaarummi tamatumani ukiuni tallimaniit arfineq marluk angullugit sivisussuseqartussami Nuup illoqarfittaani qullitalinnik ilusilersuinikkut, qullilersuinikkut allatigullu qaammaqqqusersuilersaartoqarpoq ukiukkut oktobarip aallartinneraniit marsip naanissaata tungaanut ingerlanneqartartussamik.
James Carpenterip saqqummiinissamini Nuummi sapaatip akunnerata naanerani misissuisimanini aallaavigissavaa. Saqqummiineq tuluttut ingerlanneqassaaq, nutserisoqarumaarporlu.
James Carpenter suliani immikkuullarissoq nutaaliorfiusorlu Vølund Arkitekturprisianik 1.000.000 koruuninik aningaasartalimmik nersornaatisissutigeqqammerpaa, nersornaallu taanna illussanik titartaasartut nunarsuarmi marluinnaat siornatigut pissarsiarisimavaat, aap-paralugu qallunaaq illussanik titartaasartoq tusaamasaq Jørgen Utzon. James Carpenteri pillugu paasisaqarnerorusukkaanni www.jcdainc.com alakkarneqarsinnaavoq.
Tamatuma saniatigut Bornholms Kunstmuseumimi pisortaq Lars Kjærulf-Møller aamma ilisi-matooq Henrik Bennetsen Stanford University Open Source Centerimi Silicone Valleymiittumi pisortaatigisoq eqqumiitsulianik 3D-nngortitanik saqqummiiffissatut Kalaallit Nunaanni katersugaasiviliorsinnaanermut takorluukkaminnik saqqummiissapput, taannalu nittartakkatigut nittarsaassiveqartussaq Bornholms Kunstmuseumimi pioreersumit ilaatigut Danfoss Universitymik suleqateqarnikkut pilersinneqarsimasumit aallaaveqartinniarneqarpoq.
Takorluugaq ataatsimiinnermi oqallisigineqartussaq Kommuneqarfik Sermersuumi Kalaallit Nunaannilumi atuartunut, ilinniartunut, innuttaasunut aammalu kalaallinut Danmarkimi najugalinnut allanullu nunani allani najugalinnut kalaallit eqqumiitsuliaannik soqutigisalinnut qanoq iliorluni nittartakkatigut nittarsaanneqarsinnaaneranik siunnersuusiorfigineqassaaq.
James Carpenter Europami qaammaqqusersuinermut perngaataasumik katersugaasivilior-tussatut Bornholm Kunstmuseumimut atasussamik akuersaarsimavoq, imaassinnaavorlu Nuummi eqqumiitsulianik 3D-nngortitanut katersugaasiviliorsinnaanermut soqutiginnilersinnaasoq.