Skip to main content

Cairn uuliamik nassaarpoq

Cairn Energy uuliasiorfinnit siullersaalluni nunatta kitaan uuliamik nassaartuuvoq.

Cairn Energyp immami Qeqertarsuup Nuussuullu avataani uuliasiorluni qillerinerinit angusat kingulliit avammut nalunaarutigeqqammerpai. Cairn ilisimatitsivoq qillerivimmi Alphamik taaguuteqartinneqartumi uuliamik nassaartoqartoq. Uulia immap naqqaniit 460 meter itissutsimi piffissami innermik anitsiffiusup nalaaneersumi immikkoortumi issusuumi nassaarineqarpoq.

- Uuliaqarneranik gasseqarneranullu uppernarsaataavoq sumiiffimmi tassani petroliumik tunngaveqartumik peqarfiummat. Siggummi allanilu ujaasinermi taama siusitsigisukkut pimmat assorsuaq isumalluarnarpoq, taama oqarpoq Bill Gammell Cairn Energymi qullersaasoq tusagassiuutigigut nalunaarummi ullaaralaaq takkuttumi.

Qillerivimmit qaqitat misissuisarfinni misissukkat arlallit takutippaat uuliat assigiinngitsut marluk tamaani nassaassaasut, tassa piffissaq uuliat pinngorfigisimasaat aammalu sananeqaataat assigiinngitsuusut. Tamaani qillerisoqalermalli aatsaat uuliamik nassaartoqarpoq. Maannakkorpiaq nassaanit uuliat assigiinngitsut sananeqaataat paasilluarumallugu misissueqqissaarnernik ingerlatsisoqaleruttorpoq.

Uuliasiorluni qillerivik Stena Don qilleriffimmi Alphamiittoq immami Qeqertarsuup avataaniippoq. Qillerinerit pilersaarutit malillugit ingerlateqqinneqarput pilersaarutaareersullu malillugittaaq aatsaat itissuseq aalajangersimasoq tikinneqarpat unitsinneqassallutik, tassami itinerusumi soqarnera takoqqaarusunneqarmat aamma.

- Aasaanerani qillerinerup inernerivai suli isumalluarnarnerusut. Sumiiffimmi tassani kulbrinteqarfeqarneranik ilimasuuteqartarsimaneq inernerit naqissuserpaat, aatsitassanut naalakkersuisoq Ove Karl Berthelsen oqarpoq.

Sumiiffimmi tassani qilleriffiusumi T8-mi gas-italinnik nassaartoqartoq, taamaalilluni sumiiffiit qilleriffiusut tamarmik kulbrintitalinnik nassaarfiupput. Qilleriffilli T8 uuliasiorfimmit taamaatiinnarneqarpoq tassungalu aningaasartuutit 84,2 million kronit nalikilliliissutigineqarlutik. Puilasoq taanna matuneqarpoq.

Qillerinermit inernerit pillugit paasissutissat sukumiinerusut kingusinnerusukkut nalunaarutigineqarumaarput, soorlu pitsaassusaat annertussusaallu niuernikkut atorneqarsinnaanersoq nalilerneqassalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER