Telefonikkut siunnersuisarfimmut sianertartut amerlipput
Atermik taasinani telefonikkut siunnersuisarfik Attavik 146 amerligaluttuinnartunik saaffigineqartalerpoq. Oqaloqatigiissutigineqartarput kiserliorneq atornerluinermillu ajornartorsiutit.
Atukkat oqimaatsut oqaloqatigiissutigineqartarput telefonikkut siunnersuisarfik Attavik 146 innuttaasunit atugarliortunut sianerfigineqaraangat.
Tamanna 2009-mut kisitsisitigut takussutissiami takuneqarsinnaavoq, ilanngullugulu takuneqarsinnaavoq 2008-mut sanilliullugu sianertut amerleriarsimasut.
2009-mi ATTAVIK 146-mut sianertut 194-iusut nalunaarsorneqarsimapput. Oqaloqatigiinnerni ajornartorsiutit sammineqarnerugajuttartut suli tassaapput kiserliorneq atornerluinermillu ajornartorsiutit.
2009-mut ukiumut takussutissiap takutippaa siunnersuilluni oqaloqatigiinnerni sammineqarnerugajuttartut kiserliorneq, atornerluinermik ajornartorsiutit aammalu pisimasut kingunerluttut, assersuutigalugu timikkut tarnikkullu nakuuserfigineqarnerit. Taamaasilluni 2009-mi ajornartorsiutaagajunnerusut aamma tassaapput 2008-mi siunnersuinermik oqaloqatigiittarnerni ajornartorsiutaagajunnerusartut.
2009-mi ATTAVIK 146-mi oqaloqatiginnittarnerit tamarmik affai inorlugit imminorneq imminoriarnerlu sammineqartarput. Imminorneq imminornissamillu isumaliutit atorneqarnerukkajunnerugunarput inunnit kingunerluttunik misigisaqarsimasunit, soorlu nakuusernermik pinngitsaalineqarnermillu.
2009-mi ATTAVIK 146-mut sianertut 68 procentii arnaapput. Inuit tamarmik siunnersortinniarlutik sianertut pingajorarterutaasa missarpiaat 20 aamma 29-it akornanni ukioqarput, sisamararterutaallu 40 aamma 49-t akornanni ukioqarlutik.
Inuit siunnersuisarfimmut sianertut 38 procentii Qaasuitsup Kommunianeersuupput, 31 procentii Kommuneqarfik Sermersuumeersuullutik, 21 procentii Kommune Kujallermeersuullutik 10 procentiilu Qeqqata Kommunianeersuullutik. Oqaloqatiginninnerit 86 procentii illoqarfinneersuupput.
ATTAVIK 146-mik siunertaavoq innunnut, imminornissamik eqqarsartunut imaluunniit allatut inuttut atugarliortunik, akeqanngitsumik siunnersuisarnissaq.