Innaallagissiuut anorisaat kaffillerluni atoqqaarfissiorneqarpoq

Nunatsinni innaallagissiuutit anorisaatit siullersaat Sarfannguani atulerpoq. Nunaqarfimmi innaallagissiorfimmut dieselitortumut tapertatut innaallagissamik mingutsitsinngitsumik tunisassiussaaq.

Nunatsinni innaallagissiuutit anorisaatit innaallagissiorfimmut attavilerneqartut siullersaat Sarfannguani atulerpoq.

Center for Arktisk Teknologimi ukiuni tallimani piareersareerluni ullumikkkut pingaartoq anguvarput, innaallagissiuut anorisaat maanna maanna innaallagissiulermat. Ualiartukkut anorip anorisaat kaavitilermagu innaallagissiuut anorisaat nunaqarfimmiunut ingerlaannavik innaallagissiulerpoq.

Taamatut oqaluttuarpoq Lektor Esben Larsen, DTU Elektro-meersoq.

Innaallagissiuut anorisaat 10 meterinik portussuseqarpoq suluusaalu 6 meterinik angissuseqarlutik. Generatori ikkunneqartoq 6kW-nik sakkortussuseqarpoq. Center for Arktisk Teknologi-p ukiuni arlalinni nunaqarfimmi anori uuttortartarsimavaa qaqqallu qaavani Tele Greenlandip napparutaata eqqaaniittoq anorisaammut naleqqulluartoq paasillugu. Anorisaat Telep napparutaata sanianut siorna napparneqarpoq, aatsaalli ukioq manna anorisaat innaallagissiorfimmut attavilerneqarpoq. Naatsorsuutigineqarpoq innaallagissiuut anorisaat 17.000 kWh-t angullugit tunisassiorsinnaasoq, taamaasilluni innaallagissiorfik ukiumut uuliamik 6.000 liiterimik sipaaruteqarsinnaalluni.

- Aallartinneq suna tamarmi ajornakusoorpoq - aamma Kalaallit Nunaanni. Nunatsinni innaallagissiuutit anorisaatit innaallagissiorfimmut attavilerneqartut siullersarimmassuk akuersissut Naalakkersuisunut tunniunneqarpoq. Nunaqarfinni mingutsitsinngitsumik innaallagissiornissaq anguniarneqarmat akuersissut upernaaq tunniunneqarpoq.

Anorisaatinik innaallagissiuutinik innaallagissiorneq iluatsilluassappat ilaatigut pisariaqarpoq nunatsinni sumiiffinni anorit ilisimalluarnissaat. Center for Arktisk Teknologi nunatsinni anorinut uuttortaateqarpoq arfineq-marlunnik, anorip nukinganik atuisinnaanermut periarfissat misissorniarlugit. Nunaqarfimmi sanilianiittumi Itillimi anorip nukinga imarmik tarajuiaassummik immikkut ittumik atorneqarsinnaanersoq misissorneqarpoq.

- Innaallagissiorfik anorisaat Sarfannguani atoqqaarfissiortinneqassaaq arfininngornermi aggustip 14-ianni nal. 14 kaffillernikkut. Kikkut tamarmik tikilluaqquneqarput, Esben Larsen oqaluttuarpoq.

Powered by Labrador CMS