Pakistanimut 50.000 koruunit

Dansk Røde Korsip Pakistanimi ikiuiniarluni sulineranut Kalaallit Røde Korsiata nuna tamakkerlugu kattuffiata 50.000 koruunit tunniuppai.

Qarsutsinernut atatillugu Pakistanimi ikiugassanut FN 2,6 mia. koruuninik qinnuteqarpoq. Ass.: AP/Polfoto

Pakistanimi inuit 4 millionit missaanniittut qarsutsinernit eqqorneqarput, naatsorsuutigineqarporlu 250.000-t sinnerlugit angerlarsimaffitik annaasimagaat kiattup sialussuanik siallerujussuarneratigut qarsutsinerit pissutigalugit.

Taamaattumik Kalaallit Røde Korsiata Kattuffiat aalajangerpoq kattuffiup nunani tamalaani ajunaarnersuarnut aningaasaateqarfianit 50.000 koruuninik tapiissuteqarniarluni.

Pinngortitami ajunaarnersuaq ersissutigineqarpoq 2005-imi nunap sajunneranit ajornerusoq, taamanikkut inuit 86.000-t ajunaarmata. Tamatumunnga pissutaavoq qarsutsinersuit annertoorujussuarmik aseruisimammata, najugaqartunut sivisuumik kinguneqartussamik.

Pakistanimi qarsutsinernit eqqorneqartunut ikiuerusukkuit aningaasanik DRK-p katersuinermut kontuanut ikisisinnaavutit uunga 9641 9 30 30 30.

Powered by Labrador CMS