Issittoq pillugu tusarniaanermi ministerit peqataanianngillat

Issittumi atlantikullu avannaani siunissami isumannaatsuunissamik upalungaarsimanissamillu qallunaat ministerit pingasut soqutiginninnginnerat IA sinnerlugu folketingimut ilaasortap Sofie Rossenip pakatsissutigaa.

Issittumi upalungaarsimaneq isumannaatsuunerlu pillugit tusarniaanermi nunanut allanut ministeri Lene Espersen ministerit pingasut peqataajumanatik nalunaartut ilagaat. Ass.: Thomas Borberg/Polfoto

Ukiuni makkunani issittumi atlantikullu avannaani umiarsuaqartarnerata annertuseriarujussuarnerani siunissani isumannaatsuunikkut upalungaarsimanikkullu unammilligassat pillugit folketingimi aqagu tusarniaanissami avatangiisinut ministeri Karen Ellemann, nunanut allanut ministeri Lene Espersen illersornissamullu ministeri Gitte Lillelund Bech peqataanianngillat. Peqataaniarnatik tamarmik nalunaarsimapput, tamannalu IA sinnerlugu folketingimut ilaasortap Sofia Rossenip pakatsissutigaa, taassuma Nordatlantiske Gruppimi ilaasortat allat peqatiglaugit Folketingip Illersornissamut Ataatsimiititaliaa tusarniaasoqarnissaanik kajumissaarsimagamiuk.

- Pakatsinarpoq ministerit taakkua pingasut tusarniaanissamut peqataarusunngimmata. Ullumikkut Issittumi isumannaatsuunissamut upalungaarsimasoqanngilaq. Tamanna peqatigalugu umiarsuit takornariartaatit amerligaluttuinnarput Nordvestpassage-kullu angalanissaq soqutigineqaleraluttuinnarluni. Ilanngullugu nukissiornermi pisuussutinik piiaanermut atatillugu umiarsuit assartuutit amerligaluttuinnarput, Sofia Rossen oqarpoq.

Avatangiisinut ministereqarfimmi Karen Ellemannip (V) peqataasinnaannginneranut utoqqatsissutigineqarpoq qaaqqusissut Nunanut Allanut Ministeqarfimmut, tamatumunnga akisussaasumut, ingerlateqqinneqarsimasoq. Nunanut Allanut Ministereqarfimmit oqaatigineqarpoq Lene Espersen (KF) peqataarusussimagaluartoq, ullorli taanna Det Konsevative-t folketingimi gruppiat aasaanerani ataatsimiinnissaa pissutigalugu peqataasinnaanngitsoq. Kiisalu Illersornissamut Ministerqarfimmit paasissutissiisarfik nassuiaavoq illersornissamut ministeri Gitte Lillelund Bech (V) allanik suliassaqarami piffissaqanngitsoq, tusarniaanissarlu aatsaat juulip qiteqqunnerani pilersaarusiorneqarsimammat. Tamatuma saniatigut issittoq atlantikullu avannaa pillugit ullaaq manna Illersornissamut Ataatsimiititaliamit paasissutissinneqarsimasoq, taamatut nalunaarpoq Illersornissamut Ministereqarfik, oqaatigiumanaguli pingasunngorpat ullaap tungaani tusarniaanissamit ministeri suliassat suut pingaarnerutinnerai.

Ministerit borgerligiusut peqataanianngitsut, tusarniaanermi peqataassapput folketingimut ilaasortat arlallit kiisalu Atlantikup avannaannit politikerit nuimanerit, ilaatigut Naalakkersuisut siulittaasuat Kuupik Kleist. Tamatuma saniatigut atorfillit qitiusumik inissisimasut pisortallu arlallit peqataassapput, ilaatigut Nunatsinni Sakkutooqarfiup pisortaa aamma Peter Sønderstrup, Søfartsstyrelsimeersoq, taakkualu siunissami upalungaarsimanermjut pisariaqartitanik naliliissapput.

Tusarniaanermi Kuupik Kleistip saqqummiutissavai silap pissusiata allanngoriartornerata annertusiartornera tamaanilu isumannaatsuunissap nutaap erseriartuaarnera ilutigalugit Kalaallit Nunaannut unammilligassat periarfissallu immikkut ittut.

Powered by Labrador CMS