Cairnip uulia nappartat 250 millionit amigaatigai
Skotlandimiut slskabiat uuliaqarferujussuarmik nassaartariaqarpoq ujaasineq akilersinnaassappat, siunnersorti naliliivoq.
Nunatta ataata uuliaqarneranik gas-eqarneranilluunniit ilisimasat annikitsuararsuupput. Ilanngullugu uuliasioqatigiiffiit nunatsinni ingerlatsinerat nunatsinnullu assartuinerat ajornakusoortuuvoq. Tamakku tamarmik aningaasartuutaapput, taamaasillunilu nunarput uuliamik ujaasiffigissallugu nunarpassuarnit allanit akisuneruvoq.
Tamanna tunngavigalugu uuliasiornermi siunnersorti Wood Mackenzie nutaarsiassaqartitsivimmut Reuters-imut naliliivoq, Cairn uuliaqarfimmik nappartanik 250 millionit sinnilinnik annertutigisumik uuliaqartigisumik nassaartariaqartoq, Kalaallit Nunaanni uuliasiornera niuernerpalaartumik ingerlatsinertut taaneqarsinnaassappat. Cairn-ip siumut nalunaarutigereersimavaa nunatsinni ujaasinermut milliardilinnik aningaasaliissuteqarniarluni, tamatumalu saniatigut selskabip indiami immikkoortortaqarfini niueqatiginiarsaraa, Kalaallit Nunaannut aningaasanik amerlanerusunik pissarsiniarluni. Nunarput selskabip pingaartinnersarilersimavaa.
Tamatumunnga atatillugu Wood Mackenzie oqarpoq naatsorsuutigineqartoq Kalaallit Nunaata ataa uuliamik nappartanik 20 milliardinik annertussusilimmik peqartoq. Apeqqutaaginnarpoq selskabit sumiiffinni eqqortuni ujaasinersut, aammalu uuliaqarfiit uuliamut aserorsaataasuniinnginnersut, assersuutigalugu sioqqani.