Oqummik akiuiniarluni paasisitsiniaaneq
Paasisitsiniaanikkut nutaakkut oquk akiorniarlugu nammineq najugaqartutut qanoq iliorsinnaaneq iliortariaqarnerlu sammineqassapput.
Qaammatini kingullerni Kalaallit Nunaanni inissiarpassuit ilaatigut oqummik eqqorneqarsimasut sammineqaqqilersimapput.
Maanna Inissiaatileqatigiiffik Ini, Namminersorlutik Oqartussanit pigineqartoq, namminersorlutik oqartussat qinnuteqarnerat tunngavigalugu paasisitsiniaalerpoq.
- Oquk inissiat sananeqaataannik aserfallatsaalineqannginnerannillu pissuteqarsinnaavoq, najugaqartullu qinnuigaavut oqoqarneranik pasittsaassaqarunik tamanna Ini-mut nalunaarutigeqqullugu, Ini-mi pisortaaneq Kenneth T. Hansen tusagassiorfinnut nalunaarummi nassuiaavoq.
- Oqoqalernerani aamma pikulasarpoq najugaqartup inissiami nammineq iliuuseqarneratigut, tamatumanilu paasisitsiniaanitsigut najugaqartut oquk pillugu annertunerusumik paasissutissinniarpavut. Namminneq oquk akiorniarniassammassuk. Taamaasiorusuttummi qularutiginngilarput, pisortaq itisiliivoq.
Paasisitsiniaanermik aallakaatitassiat septembarimi KNR-imi illoqarfiillu radioqarfiini aallakaatinneqassapput. Ilanngullugu oquk pillugu quppersagaliortoqassaaq aammalu najugaqartut immikkoortoqarfiini najugaqartullu pisiniarfiini plakatinik nivinngaasoqassalluni.