Tartupaluk nunatsinnut atasutut nalunaarsorneqarpoq

Google Maps-imi "Hans Ø" (Tartupaluk) ujaraanni qeqertaq nunatsinnut atasutut nalunaarsorneqarsimavoq, taamatut allappoq internettimi atuagassiaq ComOn.

Google Maps malillugu Tartupaluk nunatsinnut atavoq. Ass.: Sakkutuut imarsiortut

Quppernerullu qallunaatoortaani canadamiutoortaanilu ujarleraanni qeqertaq nunatsinnut atasutut nalunaarsorsimavoq, dr.dk allappoq.

Danmarkip Canadallu ukiuni kingullerni 40-ni assortuussutigisimavaat qeqertaq inoqanngitsoq, nunatta avannaata canadallu qeqertaata Ellesmere Islandip akornisa qiterpiaani inissisimasoq, kiap pigineraa.

Nunat taakkua marluk qeqertaq assortuussutigaat pissutigalugu tamanna qularnanngitsumik arlalinnik pinngortitap pisuussutaanik peqarmat, aammalu pissutigalugu ikerasakkut umiarsuit angalasalersinnaammata nunarsuup kiatsikkiartornera ingerlaannassappat taamaattumillu Canada avannaqqullugu Manerassualiartoqarsinnaalerluni.

Qallunaat canadamiullu sakkutuui imarsiortut akuttunngitsumik qeqertaliartarput nunamik erfalasuat amujartorlugu, tamannalu peqatigalugu akeqqaminnut imigassaq ilivitsoq ilisarlugu.

Powered by Labrador CMS