Skip to main content

AG isumaqarpoq: Avatangiisinut eqqortoq

Silap allanngoriartornerata sunniutai eqqartorneqartillugit Kalaallit Nunaat ukiuni makkunani maluginiarneqartarpoq. Qallunaat nunanilu allamiut avatangiisinut ministerii Ilulissanut tikeraarsimapput, gasit silaannarmik kissatsitsisartut sermersuarmik qanoq annertutigisumik aatsitsisimanerat qanimut takujumallugu, silalu ilumut kissatsissimasoq namminneq takujumallugu. CO2-mik aniatitsinerup annikillisinnissaa nunarsuarmi tamarmi nunanit tamanit sulissutigineqassasoq anguniarneqarpoq. Uagut naalakkersuisuvut aamma Inuit Issittormiut Kattuffiat annertunerpaamik paasisitsiniaapput, silap allanngoriartornera pissutigalugu sikut pissusaat aamma allanngoriartormata, pisuussutinut uumassusilinnut annertuumik sunniuteqarlutik. Piniartut aalisartullu allannguutit qanimut misigisaqarfigisarpaat, upernaarlu manna arlaleriarluta tusarfigisarpavut nannut inuit najugaqarfiinut arlaleriarlutik annguttarsimanerat.

Taamaattumik avatangiisinik ilisimasaqarlualernissamik kissaateqarnermut pissusissamisoorpoq. København-imi sila pillugu ataatsimeersuarnermi borgmesterit ataatsimiinneranni Kommuneqarfik Sermersuumi borgmesteri Asii Chemnitz Narup nammineq oqarpoq Nuuk erngup nukinganik innaallagissiorfimmit innaallagissamik 100 procentimik pilersorneqartoq. Nuummi Qinngutsinni Namminersorlutik Oqartussat nutaanik sanaartortitsineranni sanaartukkat kiassaatinik uuliatortunik kissasserneqarnissaat tusarlugu taamaattumik eqqarsalersitsivoq - naak innaallagissamik kiassaatit aamma ikkussuunneqassagaluartut (qupp. 5-imi allaaserisaq atuaruk). Taamaattoq inuinnarnut akisussaaq kiassaatinik uuliatortunik innallagissamillu kiassaatinik najugaqarfimmut nutaamut ikkussuisoqarnissaa. Ukiuni tulliuttuni amerlasoorpassuarni tamanna aaqqiissutaassava? Ukiuni avatangiisinik illersuiffiusuni avatangiisinut akornutaasunik kiassarnermik atuinissamik toqqaaneq ilumoorsinnaava?

Turbinet sisamassaannik ukiuunerani qaammatini marlunni innaallagissamik pisariaqartitsinermik matussusiisussamik ikkussinissaq akisuallaartoq Nukissiorfiit isumaqarmata soorunami paasilluarneqarsinnaavoq. Illunilli piginnittut avatangiisinik illersuerusuttut taava qanoq iliussappat? Grønlandsbanken avatangiisit pillugit taarsigassarsisitsisarnermik maannakkut pingaartumik periarfissiimmat, kiassaatit uuliartortut innaallagissamik kiassarnissamik taarserlugit aningaasaliissuteqarnissami. Avatangiisit pillugit taarsigassarsisitsisarneq nunatsinni tamarmi illuutillit soorunami aamma iluaqutigissavaat. Pingaartumik illoqarfinni erngup nukinga atorlugu innaallagissiorfilinni imaluunniit taamatut innaallagissiorfittaartussani. Erngulli nukinganik innaalligissiorfiit siunissaq eqqarsaatigalugu qanoq pitsaatigisumik qularnaarneqarsimappat? Kujataa erngup nukinganik innaallagissiorfeqarpoq, upernaaq manna nutaaq Sisimiuni atorneqalerluni, ukiullu arlaqanngitsut qaangiuppata Ilulissat taamaattumik innaallagissiorfittaassapput. Nuup eqqaani Utoqqarmiut Kangerluarsunnguanni erngup nukinganik innaallagissiorfik malinnaasinnaanngilaq. Ukiunilu kingullerni 20-ni illoqarfiit pingaarnersaat qanoq annertutigisumik alliartorsimasoq eqqarsaatigigaanni, illoqarfiup tamarmi qaamanermik kiassarnermillu pilersorneqarnerani turbinet pingajuat naammanngimmat eqqarsalersitsivoq - illoqarfiullu pisariaqartitsineranut naleqqiullugu turbinet sisamassaannik ikkussuinissaq akisuallaarluni.

Akisuunut aningaasaliissuteqannginnermi, soorlu erngup nukinganik innaallagissiorfimmut, aningaasivik aningaasanik soorunami imaqartariaqarpoq. Pingaartumik landskarsip aningaasakilliorfiata nalaani. Nunatsinni erngup nukinganik innaallagissiorfiit siunissamut pitsaanerusumik qularnaarneqarnissaat pitsaanerpaassagaluarpoq. Nunatsinnilu nukissamik pilersuinermi suna atorneqassanersoq aalajangersaanissamik nuna tamakkerlugu politikerit piumaffigineqarnissaat taamaattumik pissusissamisuussaaq. Uulia imaluunniit erngup nukinga atorneqassappat? Qanoq annertutigisumik anguniagaqassaagut, suullu naatsorsuutigisinnaavagut? - imaluunniit toqqaannartumik oqaatigalugu, nunatsinni avatangiisit qanoq annertutigisumik illersussavagut?

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER