Kangerlussuarmut pilersaarut
Avatangiisinut naalakkersuisoqarfiup naammasseqqammerpaa Kangerlussuup eqqaata aqutsivigineqarnissaanut pilersaarusiaq. Nunarujssuup atorneqarnissaanut maleruagassat kommuni, takornariartitsisut piniartullu suleqatigiinnersisigut pilerpoq.
Aqutsinissamut pilersaarut Kangerlussuarmi eqqaanilu periarfissaareersunik siunissamilu ineriartortitsinissamik periarfissat nutaat sinaakkusersorneqarnissaannut pilersitsissaaq, naalakkersuiosoqarfimmit nalunaarutigineqarpoq.
Aqutsinissamut pilersaarutip imarai malittarisassat nunaminertat atorneqarnissaannut piumasaqaatitallit.
Pilersaarummi anguniarneqartoq tassaavoq pinngortitamut, nunataanut kulturimullu tunngasut naleqartitat illersussallugit, taamaattorli aamma piniarnermut, takornariaqarnermut, aalisarnermut allatullu inuussutissarsiorsinnaanissamut tunngasunik ineriartortitsinissaq.
Nunataata atorneqarnera nunaqarfiup Kangerlussuup eqqaani katersuussimavoq. Nunataata kujataatungaa umimmanniarfiulluni.
Soqutigisaqartut atuisartullu assigiinngitsut Kangerlussuup eqqaaniittarput. Aqutsinissamut Pilersaarummi nuna immikkoortunut pingasunut aggorneqarpoq.
1) Kangerlussuup avannaatungaa, pinngortitami naleqartitat pingaartinneqarlutik, tassaniipporlu RAMSAR-eqarfik, tassa masarsoqarfik nunanut assigiinngitsunut pingaaruteqartoq timmissat (nerlerit) isaffigisartagaat, taavalu tuttut piaqqisarfiat.
2) Kangerlussuup eqqannguani Sermersuullu tungaanut takornariaqarnermut soqutigisat pingaartinneqarput. Taamaattumik tassani piniartoqaqqusaanngilaq, takornarianut umimmannik takornariartitsisarnerit periarfissaqartikkumallugit.
3) Kangerlussuup kujasissortaa nunarujussuaq, tassani piniarnermut tunngasut pingaartinneqarput. Umimmappassuaqarfiuvoq tuttorpassuaqarlunilu. Tassaniipportaaq nuna eqqissisimatitaq Arnangarnup Qoorua, soorluttaaq aamma aatsitassanik ujarlertoqarfiulluni.
Eriagisassat itsarnitsat amerlasoorpassuit Kangerlussuup eqqaani nassaassaapput, taakku ukiuni untritilinni aavartarsimanermik takussutissiisuupput. Nunataata ilaa eriagisassat itsarnitsat tunngavigalugit UNESCO-p Nunarsuarmiut Kingornuttagassaattut allattorsimaffianut siunnersuutigineqarnikuupput sulili akuerineqanngitsumik. Imaassinnaavorlu Tasersiaq sapusiorneqassasoq ALCOA-p aluminiumik aatsitsiviliorniarneranut atatillugu.
Aqutsinissamut pilersaarut Kangerlussuup avannaani Sermersuup tungaanit kujammut Sukkertoppen Iskappep tungaanut atuutissaaq.
Pilersaarut susassaqartut suleqatigalugit suliarineqarpoq, tassalu Aalisarnermut, Piniarnermut Nunalerinermullu Aqutsisoqarfik, Qeqqata Kommunia, Grønlands Turist- og Erhvervsråd taavalu KNAPK.
Pilersaarusiaq ataani aaneqarsinnaavoq.