Energidrikkit meeqqanut naleqqutinngillat

Naalakkersuisoqarfiup Nerisaqarneq Pillugu Siunnersuisooqatigiit imeruersaatit tamakku pillugit paasisitsiniaaqqullugu qinnuvigisimavaa.

Tamanna angajoqqaanit arlalinnit saaffigineqarneq tunngavigalugu pivoq, tassani tikkuarneqarluni angajoqqaat saaffiginnissutigisimagaat meeqqamik imeruersaatinik inuummarissaatitalinnik imereernermik kingorna uummamminnik kassuttoortartut aammalu sajulertartut.

Kaffip eqeernartuata (koffeinip) sunniutai meeqqat ingerlaannaq malugisarpaat. Taamaattumik meeqqaat kaffip eqeernartuanik annikikkaluartumik najorsigaangamik malugisarpaat, soorlu uniffeerullutik, puffajanerulerlutik, annilaangalerlutik siooralerlutillu, nerisaqarneq pillugiu siunnersuisoqatigiit allapput.

Taamaattumik inassutigineqarpoq meeqqat imeruersaatinik inuummarissaatitalinnik imertaqqunagit.

Danmarkimi inuussutissaqarnermut aqutsisoqarfiup inassutai naaprtorlugit meeqqat 12 inorlugit ukiullit imeruersaatinik inuummarissaatitalinnik imertannginnissaat inassutaavoq, tamannnalu Nerisaqarneq Pillugu Siunnersuisooqatigiit tapersersorpaat.

Meeqqap kiiluni malillugit koffeini ullormut 2,5 mg-iinnaq pisinnaagaa inassutaavoq, tassalu 40 kiiliiguni ullormut imeruersaat 0,25 literip imaaniittup annertoqataa sinnilaarlugu annerpaamik pisinnaavaa..

Meeqqat inuusuttuaqqallu 12-nniit 18-inut ukiullit inanneqarput imeruersaatinik inuummarissaatitalinnik annikitsuinnarmik atuisaqqullugit.

Nerisaqarneq Pillugu Siunnersuisooqatigiit pisiniarfinnut siunnersuutigaa imeruersaatit inuummarissaatitalikkat sodavandit eqqaannut inissittaqqunagit, imigassat aalakoornartullit eqqaannut inissittaqqullugit, taamaasilluni takuneqarsinnaaniassamat tamakku meeqqanut naleqqutinngitsut.

Energidrikkit pillugit paasissutissat ataani aaneqarsinnaapput.