VM-ertussat isornartorsiortariaqannginnerarpai
Isikkamik arsarlutik nunanut allanut unammisartut ukiormanna tallimariarlutik unammigamik sisamariarlutik ajorsarput. Sungiusaasuusunerulli Morten Olesenip unammisartut ajornartorsiorsorinngilai.
Isikkamik arsarnermi qallunaat nunanut allanut unammisartui ingerlanerliortorujussuupput.
Afrikami kujallermi VM-ernermi ataasinngormat Hollandimut 0-2-mik ajorsaramik tulleriiginnarnik pingajussaanik ajorsarput, ukiormannali tallimariarlutik unamminerminni sisamariarlutik ajorsarput.
Taamaattoq qallunaat sungiusaasuunerara Morten Olsenip Danmarkip unammisartui ajornartorsiunnginnerarpai.
– Danmarkimi aamma taama pingaaruteqartiginngilaq. Pissutsit piviusorsiortumik isigeriartigit. Unammisartugut tamarmik ajunngikkaangata ajunngivittarpugut. Tamatta ajunngikkutta isornartorsiorsinnaavatsigut. Tamanna ajunngivippoq.
– Piareersaatigaluguli unamminerit tunngavigalugit isornartorsiorata, sungiusaasuuneq oqarpoq.
Nunanut allanut unammisartut VM-imi Hollandimut ajorsarnermik saniatigut aamma piareersarnermi Østrigimut, Australiamut VM-ertitsisunullu Afrika kujallermut ajorsareersimapput. Ajorsarnerilli peqquteqartarnerat Morten Olsenip eqqaasitsissutigaa.
– Østrigimut unamminitsinni arlallit peqataasinnaasimannginnerat eqqaaniarsiuk. Unammisarnitsinnilu kikkut peqataasarsimanerat qiviarnarsiuk. Tamatigut assigiinngitsuusarput, Morten Olsen oqarpoq.
Danmarkip VM-imut peqataatitai aamma ajoquteqaqattaartorujussuupput. Nicklas Bendtner, Thomas Sørensen, Simon Kjær aamma Jon Dahl Thomasson suli ajoquteqalaartiterput.
Danmarkip VM-ernermi arfininngormat Cameroun unammilerpagu sungiusaasuunerup unammisartuisa nangitinnertik suli unitsissinnaassagunanngilaat.